Temporaryong gipahiluna sa Kapalong College of Agriculture, Sciences and Technology (KCAST) sa Lungsod sa Kapalong ang mga residente tabok sa sapa sa Purok 3A Tumana, Barangay Pag-asa nga namakwit, karong adlawa, Enero 3, 2023 gumikan sa pagsaka sa tubig sa sapa.

Gikompirma sa MDRRMO Kapalong nga mokabat sa 27 ka mga pamilya nga dunay kapin kon kulang 93 ka mga indibidwal ang namakwit sa maong gihimo nga evacuation center. Hinungdan niini ang nasinating walay puas nga pag-ulan dala sa Low Pressure Area (LPA) nga nakaapekto sa dagan sa panahon sa tibuok probinsya.

Mitunol gilayon si Kuya Gov. Edwin Jubahib og pagkaon ug mineral water ngadto sa mga evacuees pinaagi sa Provincial Social, Welfare and Development Office sa pagpanguna ni PSWD Head Rosalinda Rapista. Niduyog usab sa pagtunol sa pagkaon sila Board Member Popo Estabillo ug Eva “Ling-ling” Estabillo isip representante sa gobernador.

Sa ulahing report sa PDRRMC as of 10:45 gahapon sa buntag, mga 9:15 AM, nanguli na ang ubang mga Internally Displaced Persons (IDP) sa ilang mga panimalay human sila nakapamahaw.

Lima ka lungsod ang grabeng apektado sa kusog nga ulan. Sa Lungsod sa Asuncion, lima ka barangay nga mao ang Canatan, Sta. Felomina, Cabaywa, Sagayen ug Doña Andrea nga dunay 3,058 ka pamilya o 15, 290 ka indibidwal. Samtang sa Kapalong, sa duha ka barangay sa Pag-Asa ug Capungagan, 522 ka pamilya o 2,136 ka indibidwal ang apektado sa baha.

Sa Lungsod sa Sto. Tomas, ang Barangay Salvacion nga dunay 40 ka pamilya o 200 ka indibidwal ang nahumol sa baha. Samtang sa New Corella, siyam (9) ka barangay ang nisaka ang tubig, 61 ka pamilya o 305 ka indibidwal ang grabeng apektado. Ug sa unom (6) ka Purok sa Guadalupe sa Munisipyo sa Carmen, 987 ka pamilya.

Gipasalamatan sa mga katawhan ang dinaliang suporta ni Kuya Gov ngadto kanila. Ang mga naasoy’ng pamilyang evacuees gitagsaan og tent ug banig sa MDRRMO.

Nakatutok kanunay ang atong mga lokal nga DRRMO labi na ang PDRRMC sa nagapadayong daut nga panahon ug nagpahimangno sa katawhan nga mag-igmat ug maninaw sa mga pahimangno sa panggamhanan.

Writer/Photos: Lorna P. Tripoli

 

 

 

 

 

DavNor News