Gatosan ka mga miyembro sa KAAGAPAY ang mitambong sa gipahinabong TUPAD Orientation kagahapong adlawa, Enero 23, sa Kapalong Gymanasium, Maniki, Kapalong. Tumong sa maong kalihokan ang paghatag og hinanali apan temporaryong panginabuhian ngadto sa mga benepisyaryo sa KAAGAPAY nga nag-atiman sa ilang kamanokan ug kaisdaan lakip na niini ang pag-ugmad sa gulayan isip pagsuporta sa panawagan ni Kuya Gov. Edwin I. Jubahib sa iyang nag-unang programa sa agrikultura, ang KAAGAPAY kon KAwsa sa AGrikultura ug Panginabuhian sa BarangAY.

Gitambongan ni Kapalong Mayor Ma. Theresa R. Timbol ang nasangpit nga panagtapok ug iyang gipadayag ang iyang mainitong pasalamat sa programang KAAGAPAY sanglit dako kini'g natabang ilabina sa mga gagmay nga mga mag-uuma pinaagi sa paghatag kanila'g mga suplemento ug teknikal nga panginahanglan.

Dako sab ang iyang pasalamat nga sa Kapalong mismo gipahigayon ang maong kalihokan diin siya nakigduyog sa mga benepisyaryo niini nga nagikan sa munisipyo sa Talaingod ug Sawata, isip balik-bisita sa kanhing “mother town” sa duha ka mga lungsod.

Ang Department of Labor & Employment (DOLE) Davao del Norte Field Office maoy nangunay sa mga lektura sa panguna ni Ms. Noreen Villanueva, kauban ang ubang Employment Staff, mga personahe gikan sa Provincial PESO, KAAGAPAY Staff ug mga Liaison Officers ni Kuya Gov.

Gipasabot sa taga-DOLE nga ang TUPAD o Tulong Panghanapbuhay Para sa Mga Displaced/Disadvantaged Workers maghatag og kahigayonan isip bugti sa ilang pagpaningkamot sa pag-atiman sa ilang mga manok, isda ug gulayan sulod sa napulo (10) ka adlaw balor P443.00  kon P 4,430.00 ang kinatibuk-ang kantidad nga ilang madawat gawas pa sa ilang maani nga abot, butang nga ila gikalipay sanglit duna nay gahulat nga mokompra sa ilang abot, pinaagi sa DNIPC, sa panahon sa ani.

Duna pay kapin kon kulang 800 benepisyaryo, ang mopailalom sa maong TUPAD Orientation sa sunod nga mga adlaw.

Writer/Photos: Gloria Excelsa S. Pamugas, PAdO-EWDD

 

 

 

DavNor News