Gitunol ni Governor Edwin “Kuya Gov” Jubahib ang 30 ka mga pump boat kon motorized banca sa 44 ka mga mangingisda nga sakop sa Bangsamoro nga nahisakop sa tulo ka mga barangay sa Kinawitnon, Limaw ug Tambo sa Island Garden City of Samal, niadtong Enero 13, 2023.

Gipatuman ni Kuya Gov ang maong proyekto aron matabangan sa ilang panginabuhian ang mga gagmay’ng mangingisda sa isla, sa tabang sa PAyapa at MAsaganang PamayaNAn (PAMANA) Program sa Office of the Presidential Adviser on the Peace, Reconciliation and Unity.

Naglaum ang gobernador nga moasenso ang maong mga mangingisda sa ilahang pamuyo sanglit aduna na sila’y kaugalingong Bangka nga magamit. Dili na sila mangarkila ug modako na ang ilang income. Giawhag sab sa gobernador ang mga benepisyaryo nga ampingan ang ilang mga bangka aron molahotay kini ug magamit nila sa dugay’ng panahon.

“Sayod ko nga taas kaayo mo og ambisyon para sa inyong pamilya. Apan dili man tanan parehas ang maabot. Sayod ko nga aduna moy tagsa-tagsa ka pangandoy. Apan kulang lang og pinansyal nga suporta, kulang lamang og kapital nga inyong magamit. Ug karon magpasalamat kita sa labawng Makagagahum nga ang inyong gipangandoy, wala damha nga miabot na sa inyong atubangan. Ug kanang tanan pinaagi sa pagpaningkamot sa inyong mga lideres. Atong pasalamatan si former President Rodrigo Duterte, nga siya’y una niggahin ani nga pundo ug ato sab nga pasalamatan ang atong present President Ferdinand “Bongbong” Marcos nga iyang gipadayon ang maong budget pinaagi sa opisina ni Secretary Carlito Galvez,” sulti ni Kuya Gov.

Sa mensahe ni Department of National Defense Secretary Carlito Galvez, nga gibasa sa iyang representante Cesar De Mesa ang Execeutive Director sa OPAPRU, nagpadayag sa makanunayong suporta sa nasyonal nga panggamhanan ngadto sa mga gagmay’ng mangingisda nga mahatagan og malungtarong panginabuhian.

“Ang ating pag-turnover ng motorize banca na may kasamang iba’t ibang kagamitan ay sumisimbolo sa pagnanais ng pamahalaang nasyonal sa pamumuno ng ating mahal na Pangulong Ferdinand “Bongbong” Marcos, Jr., na maiangat ang ating antas ng kabuhayan ng mga mangingisda at ng kanilang mga pamilya,” matud ni de Mesa.

Nagpaabot sa ilang dakong pasalamat ang mga mangingisda kang Kuya Gov ug sa nasyonal nga panggamhanan gumikan sa paghatag sa maong mga pump boat nga ilang magamit sa inadlaw nga panginabuhi. Malaumon sila nga mas modako na ang ilang kita sa matag adlaw sanglit layo na ang ilang maabot sa pagpanagat.

“Nagpasalamat kaayo sa OPAPP ug kang Edwin Jubahib, atong gobernador, nga dako kaayo ang among pasalamat sa iya nga nakakuha me sa iyang tabang nga gikan sa iyang administrasyon karon,” pagbutyag ni Waldo Cervantes, usa ka mangingisda sa Samal.

“Unang-una nagpasalamat mi nga niabot ni nga blessing, ang mga bangka sa amoang pagpanagat ug kang Kuya Edwin Jubahib ug sa amoang Mayor diri sa Samal Al David Uy. Dako kaayo ang among pagpasalamat sa ilaha nga niabot ni, makatabang sa among panginabuhi,” sigon ni Roel Cervantes, usa ka mananagat.

Kompleto sa fishing nets ug uban pang accessories ang nasangpit nga mga bangka nga dunay makina nga 13-horsepower Honda engine.

Writer: Nestor Mata, Jr.
Photos: Kuya Gov. Edwin I. Jubahib

 

 

 

DavNor News