Gihatud ni Governor Edwin "Kuya Gov" Jubahib ang mga serbisyo sa Kapitolyo sa Davao Prison and Penal Farm (DPPF), nga kanhi Davao Penal Colony (DaPeCol), aron mahatagan sab og pagtagad ug maatiman ang mga persons deprived of liberty (PDL).
Dala ni Kuya Gov ang mga doctor ug nurse sa Kapitolyo aron magpahigayon og medical outreach sa DPPF, nga gipakapinan pa sa mga hygiene kits, alang sa panlawas sa mga PDL.
Nanghatag sab siya og sinako nga bihon ug mga semilya sa mais ug gulayon, ug 15 ka sako nga fertilizer. Kini isip dugang sa dul-an 2,000 ka mga manok, nga una nang gihatag sa gobernador alang sa panginabuhian sa mga PDL, ubos sa DavNor KAAGAPAY Program.
Ang pag-bisita ni Kuya Gov agi'g iyang pakigduyog usab sa 91st Founding Anniversary sa DPPF.
Gipasalig niya nga paliton sa probinsiya ang mga produkto sa mga PDL nga mga manok, mais, gulayon, ug bisan ang ilang gibantog nga produktong souvenir items, aron duna sila'y dugang income samtang anaa sa sulod.
Gi-survey sab sa gobernador ang lote alang sa itukod sa probinsiya nga Alternative Learning System (ALS) sulod sa maximum security prison.
Sulti ni Kuya Gov nga giisip niyang parte gihapon ang mga PDL sa Probinsiyal nga Panggamhanan bisan pa anaa sila nagtingkagol sulod sa DPPF. Rason nga mibisita siya aron iyang masuta ang ilang panginahanglan ug ang suporta nga angay niya ihatag.
"Mayroon pa kayong chance magbagong buhay... Dito kayo magsisi at mag-promise na paglabas ninyo ay hindi niyo na uulitin ang kasalanang inyong nagawa... Habang hinihintay ninyo ang inyong paglaya, andito rin si Kuya Gov para magbigay suporta sa inyong pangkabuhayan," sulti niya.
Nalipay kaayo si Corrections Chief Inspector Divina Camiña, ang Deputy Superintendent for Administration, sa gihatag ni Kuya Gov nga mga serbisyo ug hinabang alang sa mga PDL.
"This will help us fully realize a quality prison environment conducive for the transformation of our PDLs," sulti niya.
Mapasalamaton sab kang Kuya Gov si Corrections Senior Inspector Nonie Forro, ang Deputy Superintendent for Security, tungod kay, sa iyang pagkahinumdum, "karon pa lang jud nakabisita sulod sa prisohan ang gobernador sa probinsya sa sulod sa kapin 20 ka tuig."
