Wala nagpasagad si Governor Edwin “Kuya Gov” Jubahib ug mihimo siya’g mga lakang aron mapadali ang natanggong nga Tuganay Bridge sa Carmen, Davao del Norte, nga dugay nang miperwisyo sa katawhan.

Kay naluoy siya sa katawhan, giadtoan jud ni Kuya Gov si Secretary Manuel Bonoan sa Department of Public Works and Highways (DPWH) ug gihangyo kini nga tagaa’g prioridad ang maong proyekto kay apektado na ang ekonomiya sa probinsiya.

Balik-balik pud siya sa pakig-meeting sa mga opisyales sa DPWH Regional Office ug sa 1st Engineering Office aron mapadali ang nadelatar nga proyekto.

Sulti ni Kuya Gov sa media nga dili dapat ipahid ang isyu kaniya, kay ang dapat motubag niini mao si 2nd District Congressman Alan Dujali sanglit ubos man ang maong proyekto sa development projects sa kongresista.

Butyag ni Kuya Gov nga nadelatar ang proyekto kay gipasagdan kini ug wala gihataga’g prioridad sa kongresista.

“Kining Tuganay Bridge part ni sa development projects ni Congressman Allan Dujali… (So) ang dapat mag-follow-up ani si Congressman Dujali… kini unta ang iyang gi-priority nga mahatagan og additional budget,” pagpahingusog sa gobernador.

Saysay niya nga matud sa mga opisyal sa ahensiya wala maapil ang proyekto sa mga priority projects sa kongresista sa miaging tuig mao nadelatar kini pag-ayo.

“Hangtud sa ilang kaulaw ani, gitaptapan na lang nila og color roof ang tulay. 1st time ni nahitabo,” ingon niya.

Kay dili kahilabot ang probinsiya sa maong proyekto sanglit proyekto kini sa national government, gipatarong na lang ni Kuya Gov ang alternatibong dalan padulong sa Coastal Road sa Panabo City aron matabangan ang nagdali nga mga biyahero.

Dugang butyag ni Kuya Gov ang problema sa Tadeco Road sa Panabo City nga dugay sab napasagdan ni Congressman Dujali, diin gianggaan kini nga “Killer Road”, gumikan sa daghan nang mga disgrasya ug namatay sa paglikaylikay sa mga motorista sa dagkong batsi ug bangag sa dalan.

Gibutyag sa gobernador nga nakasaway mismo ang mga opisyales sa DPWH tungod kay ang Tuganay Bridge ug Tadeco Road, nga puro dagkong proyekto wala gihataga’g priority ni Congressman Dujali.

“Naglibog jud ko ni Congressman Dujali nganong wala niya giapil sa iyang priority list kini nga mga projects… kay mga main roads ni nga importante kaayo sa atong ekonomiya… Mao na lagi lisod kung ang imong interes dili para sa mga tawo. Kung ang imong heart ba layo sa kasing-kasing sa tawo… Especially kung wala ka naga-supervise sa imong distrito… Mao jud ni mahitabo,” ingon ni Kuya Gov.

“Kung ang inyong congressman wala maglihok ani, ako nga inyong Kuya Gov naningkamot ko para mahatagan ni og hinanaling pagtagad kining duha ka proyekto nga atong giproblema,” pasalig sa gobernador.

 

 

 

DavNor News