Dili moundang si Governor Edwin "Kuya Gov" Jubahib hangtud nga hingpit nga masulbad ang pagbaha nga dugay nang problema sa katawhan sa Davao del Norte.

Kini ang saad sa gobernador sa paglusad sa Watermaster Desilting Operation sa Liboganon River sa Barangay Pagsabangan, Tagum City.

"Wala ta moundang kay ang gusto nato nga wala nay pamilya sa intero probinsiya ang maigo sa mga pagbaha," sulti ni Kuya Gov.

Gamit ang kaugalingong P50-million nga Watermaster sa probinsiya, tuyo sa gobernador nga palaluman ang Liboganon River ug Saug River ngadto sa sais metros nga kalalumon aron masulbad na ang pagbaha sa Tagum City.

"Ang atong gipangita dili band aid solution, kundi sustainable solution para sa kalamboan sa katawhan," ingon niya.

Sunod nga gilusad ni Kuya Gov ang desilting sa sapa sa mga barangay sa Nueva Fuerza ug San Agustin sa Tagum City, nga lahos hangtud sa Mesaoy, New Corella, Davao del Norte.

Gisugdan sa gobernador sa iyang unang termino ang desilting sa mga bukana ug kasapaan dungan sa iyang Oplan Canal program, diin naghimo ug gi-rehab ang mga canal subay sa standard nga sinco metros nga kalapdon ug tres metros nga kalalom.

Sukad gisugdan sa gobernador ang maong programa, dako ang pagkunhod sa pagbaha ug dili na sama kaniadto kalapad ang apektado nga mga munisipyo ug barangay, ug kung magbaha man, dali na lang mawala ang tubig.

Sa wala pa kalingkod si Kuya Gov, kada tuig mukabat ngadto sa gatosan ka milyones ka pesos ang danyos sa imprastraktura ug agrikultura.

Butyag niya nga padayon sab sa pagpangita og pondo si 1st District Congressman Pantaleon Alvarez alang sa slope protection ug river bank protection.

"Diri nato makita nga kung ang inyong lider tinud-anay nga naningkamot, o ang interes para sa paghatag og solusyon sa mga dugay nang problema sa katawhan, aduna jud tay makita nga dakong kausaban," pagtapos ni Kuya Gov.

Kauban sa gobernador sila Board Member Francisco Remitar, Board Member Ariel Macla ug former Vice Mayor Atty. Eva Lorraine Estabillo.