Dise-nuybe ka mga kawani sa kapitolyo ang gihatagan og award atol sa gipahigayong Gantimpala Agad Award, sa VIP Clubhouse, DNSTC, Mankilam, Tagum City, niadtong Pebrero 3, 2023.
Ang mga awardee nagikan sa Provincial Social Welfare and Development Office, Provincial Veterinary Office, Provincial Treasurer’s Office ug Provincial Assessor’s Office kinsa nagpakita sa ilang katakos ug impresibong pagtuman sa ilang tagsa-tagsa ka trabaho.
Nitambong sa maong awarding ceremony sila Provincial Human Resource Management Officer Edwin A. Palero, MPA, MHRM, Provincial Social Welfare and Development Officer Rosalinda O. Rapista, RSW, MPA, Provincial Veterinary Office OIC Dr. Dennis A. Sumaoy, DVM, ug Provincial Treasurer’s Office Asst. P.G. Head Belinda C. Abalunan, MPA.
Sumala ni Palero nga gimandoan siya ni Governor Edwin “Kuya Gov” Jubahib, nga kung adunay mga empleyado nga angayang hatagan og pasidungog, tagaan dayon. Kay kini makatabang matud pa,nga mas ganahan pa ang mga empleyado sa paghimo sa ilang trabaho.
“As I said this award, comes from the heart of Kuya Gov, comes from the heart of your Department Heads and Supervisors, and comes from the heart of your HR. Thank you kaayo sa inyong mga accomplishment ug good performance. Congratulations,” pasalamat ni Palero.
Nagpaabot sa iyang pasalamat kang Kuya Gov, si Marcos H. Brion, Jr., isa sa mga awardee nga nadestino sa Provincial Veterinary Office ilawon sa KAAGAPAY Program. Iyang gisaysay ang mga gimbuhaton aron sa padayong pagpakusog sa KAAGAPAY ilabi na sa Free-Range Chicken.
“Kanang mag-conduct og medication and monitoring sa mga P.O.’s, moadto mi sa field dayon maghatud mi og mga tambal. Tabangan namo tong mga P.O.’s, nga ang ilang mga manok naay sip-on, amo silang ginabisitahan at least from time-to-time amoa silang ma-monitor hangtud moabot ang time sa pag-harvest sa manok. Nalipay gyud ko nga ang among effort na-recognize gyud sa probinsya. Nagpasalamat ko kang Kuya Gov sa iyang gihatag nga pagtagad sa amoa,” sigon ni Brion.
Ang Gantimpala Agad Award nga programa nagtumong sa pagpalambo sa moralidad, pagkaepisyente, integridad, responsiveness, ug kortesiya sa serbisyong sibil, ingon man pagpalig-on sa merito ug rewards system sa probinsya.
Writer/Photo: Nestor mata, Jr.
