Nagsugwak ang kalipay uban sa paghinangop sa usa’g usa sa dihang subling nagkatigum ang mga retiradong empleyado sa Davao del Norte capitolio alang sa ika-9 nga General Assembly nga gihimo sa Molave Hotel niadtong Marso 3, 2023. Nahunong ang ilang tinuig nga tapok gumikan sa kalibutanong pandemya nga nasinati tuig 2019.

Ang maong programa giandam sa Provincial Human Resources Management Office pinaagi usab sa pagsuporta ni Kuya Gov Edwin I. Jubahib nga mapahitabo kini alang sa Provincial Capitol Retirees Association.

Gisaysay ni PHRMO Head Edwin Palero nga ang gobernador naghatag og dakong pagtagad ug suporta sa mga kanhing empleyado sa Kapitolyo nga nangretiro na isip nahimong kabahin sa paghatud sa serbisyo ug kalamboan sa Davao del Norte.

"Magpasalamat gyud ta og dako kay si Kuya Gov Edwin Jubahib wala gyud makalimot ug usa pa ko inyong HR dili pud ko malimot sa inyoha. Magsige gyud ko og hangyo nga kanunay naa gyud pondo ang PCRA, bisa’g na-charge sa HR, nakapondo gyud na para sa PCRA para magamit ninyo sa inyong mga meeting ug sa inyong mga activities," sumala ni Palero.

Dako ang tinguha sa nasangpit nga asosasyon nga ma-accredit sila ‘ning tuiga sa Sangguniang Panlalawigan alang sa mas dugang suporta sa ilang mga katikaran.

Nitunol sa suporta ang Tagum Cooperative og cheke kantidad P100,000 alang ngadto sa PCRA og nipasabot ug nihanyag og uban pang serbisyo gikan sa maong kooperatiba.

Atol sa okasyon nagtigayon og election alang sa 2023 PCRA Officers, apan nagpabilin sa posisyon ang ubang mga officers sama sa mosunod:

   President: Felicio S. Pague

   Vice President: Gaudencio E. Sarong

   Secretary: Delia Vasquez

   Ass. Secretary: Rosalinda De Guzman

   Treasurer: Leonardo C. Gaspan

   Ass. Treasurer: Francisco B. Osmenia

   Auditor: Felicidad Veloso

   PIO: Elsa M. Baldoza

   Business Manager: Arlene Semblante

Samtang ang uban nahimong mga Board of Directors.

Mensahe sa inspirasyon uban sa pasalamat ang gipaabot ni Kuya Gov Jubahib pinaagi sa iyang representante nga si Arch.Lemuel Puerto alang sa mga retirado.

Writer/Photo: Lorna Tripoli

 

 

 

DavNor News