Gitambongan sa nagkadaiyang sektor sa probinsya sa Davao del Norte ang gipahinabong Regional Tax Campaign Kick Off kagahapon sa buntag. 

Gipangunahan kini ni RDO Eddie Leo A. Galera II, luyo sa paggiya ni BIR XI Regional Director Esmeralda M. Tabule. Dako ang suporta ni Kuya Gov. Edwin I. Jubahib sa maong programa, kauban sila Hon. Dorothy M. Gonzaga, gobernador sa Davao de Oro nga girepresentahan ni Placido R. Alcomedras Jr. ang Provincial Internal Auditor.

Kini nasubay sa tema karong tuiga, “Tulong-tulong sa Pagbangon, Kapit Kamay sa Pag-ahon. Buwis na Wasto, Alay para sa Pilipino”.

Gihimo ang maong kampanya aron mapadasig ug mapahibalo ang katawhan sa importansya sa pagbayad sa sakto nga buhis. Sumala ni Regional Director Tabule, kining tinuig nga kampanya inisyatiba sa BIR aron padayong mapalapdan ang kaalam sa katawhan sa mga [hinisgutan] kabahin sa buhis ug mga saktong pamaagi sa pagbayad niini.

Ang maong buhatannangayo og suporta sa mga magbubuhis, business owners, stakeholders ug sa publiko alang sa pagmugna og pondo alang sa pagbangon sa ekonomiya pinaagi sa paghatag sa insaktong kantidad.

Matud pa ni Kuya Gov, “Ang buhis mao ang dugo ug kinabuhi sa gobyerno.” Maong pinaagi sa paghatag og livelihood program mapasiguro nga ang katawhan makahatag sa ilang tax.

Anaa sa matag katawhan ang pagbayad sa hustong buhis aron mabuhi ang ekonomiya ug molambo ang kinabuhi sa matag Pilipino, dugang ni Kuya Gov.

Writer: Maria Hannah Dela Cruz, Intern, DNSC
Photo: BIR Revenue District Office 112 - Tagum City

 

 

 

DavNor News