Sa nagpadayong disaster relief operation, liboan na usab ka mga katawhan ang gitagaan og ayudang pagkaon ni Kuya Gov Edwin I. Jubahib nga mga direktang gibahaan. Nasinati kini sa probinsya niadtong bulan sa Enero 2023 dala sa walay puas nga ulan gumikan sa shearline ug Low Pressure Area (LPA).
Duha ka libo nga mga pamilyang nidawat sa relief food sa Poblacion New Corella niadtong Marso 27, 2023. Kini ang ikaduhang hugna nga gihimo human sa deklarasyon niadtong miaging bulan nga ipailawom sa state of calamity ang probinsya.
Gipangunahan sa Provincial Social Welfare and Development Office ug Provincial Disaster Risk Reduction Management Center ang maong pag-apod-apod sa mga food packs sa mga nahimong biktima sa baha. Midawat usab sa susamang kaayohan ang mga taga-Brgy. Limbaan ug Brgy. Mesaoy. Mismong si Board Member Nicandro "Nickel" Suaybaguio Jr. ug mga representante nila ni BM Popo Estabillo, Mayor Jorjan Federiso ug Kuya Gov Jubahib ang nitambong sa distribusyon.
Gipasabot ni PSWD Assistant Head Jeffrey Calamonggay nga kabahin kini sa 27,516 nga mga giilang biktima sa baha sa nagkadaiyang LGU.
"Kung sa inyong balay tulo ka pamilya nagpuyo anang balaya, tulo pud ang makadawat, klaro? So, karon gina-validate pa ang kadtong sa MSWD. Ayaw mo’g kabalaka kay makadawat ang naapektohan. Ang instruction ni Governor, basta kadtong naapektohan sa baha makadawat," sumala ni Calamonggay.
Basi sa talaan sa PSWDO, ang mga barangay sakop sa lungsod sa New Corella nga gihatagan sa relief food packs mao ang mosunod:
Barangay Ihap sa Pamilya
Cabidianan 20
Suawon 100
Limbaan 200
Sto. Niño 20
Macgum 100
Poblacion 2,000
Carcor 10
San Jose 20
New Cortez 28
San Roque 20
Sta. Cruz 207
New Sambog 10
Del Pilar 36
Mesaoy 2,568
New Bohol 400
Gipasabot ni BM Suaybaguio nga gipaningkamotan ni Kuya Gov nga maabot gayud ang tabang sa mga katawhan sa panahon nga dunay kalamidad sama niini. Mipaabot siya’g simpatiya sa mga biktima sa baha ug gibutyag nga siya nihimo sa pag-follow up sa buhatan ni Senator Bato dela Rosa alang sa street light projects sa may Mesaoy National High School. Giawhag niya ang tanan nga sa bisan unsang katalagman, baha man o linog, gikinahanglan nga magmainampingon.
"Kanatong tanan gipaabot nako ang akong pasalamat ug manghinaot ko nga magtuloy-tuloy nga dili na unta mobalik ang baha ug linog kay kabalo ka pait gyud, tinuod ba? Pait gyud labi na nga kita diri nagsalig sa uma maong naningkamot mi diha sa probinsya nga mahan-ay diha ang atong budget nga mahatag nato sa katawhan sa probinsya," saysay ni BM Suaybaguio.
Samtang nagpaabot sa distribusyon, lamian ug mainitong lugaw ni Kuya Gov ang gidalit sa mga katawhan.
Writer/Photo: Lorna P. Tripoli
