Personal nga gitunol ni Governor Edwin "Kuya Gov" Jubahib ang dugang ayuda alang sa mga residente sa Lungsod sa Carmen nga biktima sa milabayng pagbaha. Isip kabahin sa nagpadayong Kuya Gov Relief Distribution 2023, sa Mangalcal Gym, Brgy. Mangalcal, Carmen, niadtong Marso 28, 2023.
Sumala ni Provincial Social Welfare and Development Officer Rosalinda Rapista, mokabat sa 3,432 ka mga pamilya ang nakadawat sa maong mga ayuda. Gilangkoban kini sa unom ka barangay sa maong lungsod, nga hilabihang naapektohan sa milabayng pagbaha nga resulta sa shear line weather condition kon ang panagtagbo sa bugnaw ug init nga hangin dala ni amihan ug easterlies.
Dugang ni Rapista nga aduna pay duha ka lungsod ang ilang tagaan og ayuda nga mao ang Siyudad sa Tagum ug Lungsod sa Sto. Tomas.
“So, karon ikalima ni ka adlaw wherein si Kuya Gov nag-distribute sa mga affected. So, ganihang buntag didto ta sa Mangalcal diin adunay 1700 families affected, composed of Brgy. Tubod, Brgy. Mabuhay and Mangalcal. This afternoon, naa ta dinhi sa New Camiling Gym para pud sa ikaduhang cluster sa New Camiling ug Magsaysay. Naay 1700 families affected niadtong niaging pagbaha. So, hinaut kini nakatabang sa mga lumolupyo nga kanunay mabahaan tungod kay ang ilang area ubos ug dali ra gyud ni sila mabahaan,” matud ni Rapista.
Sa mensahe ni Kuya Gov, nanaad kini nga mangita’g solusyon aron mahatagan og kasulbaran ang dugay nang problema sa baha sa nasangpit nga mga lugar. Kalakip sa gipanaad ni Kuya Gov ang pagbubo og pondo alang sa pagsemento sa kalsada sa Barangay Mangalcal padulong sa Brgy. Cebulano. Dugang ni Kuya Gov nga iyang ipadayon ang desilting sa mga nag-unang kasapaan nga makaapekto sa paspas nga pagsaka sa tubig panahon sa ting ulan.
“Ang problema sa baha, kabahin gyud na sa atong probisyal nga problema. Mao gyud nang atoang gipangitaan og solusyon nga unta mahuman ning problemaha sa pagbaha. Mao nang nagpalit ko’g rescue vehicle nga dagko para makasulod sa mga purok bisa’g taas ang tubig para ma-rescue kadtong ma-stranded natong mga kaigsuonan. Gi-desilting nato ang Libuganon River, ang Saug River para nga makontrol nato ang pagbaha,” saysay sa gobernador.
Nanghinaut si Kuya Gov nga magkahiusa ang tanang mga opisyales sa gobyerno aron magtinabangay sa paghatud sa mga kinahanglanong proyekto ug serbisyo sa katawhan sa probinsya.
“…Governor’s office, atong mga department heads nato sa probinsya, Sangguniang Panlalawigan, congressman, mayor, mga city ug municipal councilor, barangay captain ug barangay kagawad, maningkamot mi. Ako, gusto nako nga bisan managlahi ang among mga partido, gusto nako nga magkuyog mi, paghatud serbisyo sa matag usa kaninyo,” panghinaut ni Kuya Gov.
Nagpaabot sa iyang dakong pasalamat kang Kuya Gov ang Kapitan del Barrio nga si Kapitan Romeo Borja sa Brgy. Mangalcal, gumikan sa hinanaling tabang sa gobernador sa iyang mga ginsakopan. Kalakip sab sa iyang gipasalamatan ang daghang mga proyekto nga gibubo niini sa iyang barangay sama sa katukoran sa duha ka andana nga barangay hall nga nikantidad P5 milyon, senior citizen’s office nikantidad P1 milyon, day care center kantidad P1.2 milyon, dugang classroom sa Brgy. Mangalcal National High School, steel gate arc, ug daghan pang uban.
“Si governor, wala siya nagpasagad sa mga tawo diri gumikan sa iyang tabang sa amoa. Nakahatag siya’g relief goods 1,070 ka balot, 133 ka sacks ang gihatag ni gov diri. Gani gahapong adlawa, niabot diri sa amoa ang items sa relief goods. Karong adlawa gianhian gyud mi ni gobernador. Nagpasalamt mi’g dako tungod sa mga katawhan sa Brgy. Mangalcal nga nakakita kang gov. Nalipay pu’g dako ang mga katawhan sa Mangalcal kay niari gyud siya diri. Nakita gyud sa mga katawhan ang mga proyekto nga gihimo ni gobernador,” pagpasibaw ni Kapitan Borja.
Plano karon ni Kuya Gov nga himoan og dagkong kanal ang mga kabarangayan nga kanunay maapektohan sa baha. Sa ingon nga paagi, mokunhod ang pagtaas sa tubig ug dali lang sab kining mohubas.
Writer/Photo: Nestor Mata, Jr.
