Nangunay pagtunol sa dugang ayuda si Governor Edwin “Kuya Gov” Jubabib alang sa mga residente nga biktima sa pagbaha isip kabahin sa Kuya Gov Relief Distribution 2023, sa Ezperanza Gym, Brgy. Ezperanza, Sto. Tomas, niadtong Abril 1, 2023.
Mokabat sa 596 ka mga pamilya nga grabing naigo sa milbayng pagbaha ang nakadawat sa food packs nga gipang-apod-apod sa gobernador.
Sa mensahe sa gobernador, gisaysay ang iyang mga plano sa paghatag serbisyo ug mga proyekto sa 223 ka mga barangay sa probinsya. Siya nagkanayon nga tanang mga kabarangayan iyang hatagan aron walay magmahay. Bisan pa dili niya kaalyado sa hisgutanang political apan wala siya’y pilion sa paghatud sa tinud-anay nga serbisyo.
“Gusto gyud nako moadto sa mga barangay para makita nako ang sitwasyon sa mga barangay ug akong mahatagan dayon og pagtagad ang mga priority projects nga gikinahanglan sa barangay. Di man nato mahatag tanan sa kadaghan. Unya ang akoang batasan ‘pag maghatag ko’g project sa isa ka barangay, kinahanglan ang 223 barangays sa Davao del Norte parehas tanan mahatagan og proyekto para wa’y magselos,” sulti ni Kuya Gov.
Nanaad ang gobernador nga hatagan og relocation site ang mga residente sa tulo (3) ka mga barangay nga mao ang Salvacion, Talomo ug Esperanza, nga duol sa dike ug maoy grabeng maapektuhan panahon sa baha.
Gimandoan ni Kuya Gov ang mga kapitanes sa pagpangita gilayon og igong luna sa yuta nga maoy bahinbahinon sa mga benepisyaryo. Dugang sa gobernador nga siya ang moabaga sa tanang galastuhan sa pagtukod og balay, sama sa kahoy, semento, sin, graba ug uban pang gamitonon sa konstruksyon. Apan nihangyo kini sa mga residente nga sila na maoy motrabaho sa ilang umalabot nga panimalay.
Nagpaabot sa iyang dakong kalipay ug pasalamat si Kapitan Alfredo M. Maduay sa Brgy. Esperanza gumikan sa way puas nga suporta nga gihatag ni Kuya Gov sa iyang barangay. Gani sa dili madugay mobarug na ang duha (2) ka andanang barangay hall nga gipondohan sa probinsyal nga panggamhanan ingon man usab ang pagpasemento sa kalsada pasulod sa maong barangay.
“Sir, Kuya Gov Edwin Jubahib, among ipaabot kanimo ang among mainitong pasalamat tungod kay ikaw Kuya Gov makita gyud diha sa among barangay. Dili ka makita sa kalendaryo lamang kundili ang personal nimong presensya makita sa matag barangay. Mao ni akong giingon, the working governor, the visible governor in every barangay,” pagbutyag ni Maduay.
Kahilakon nga mipasibaw sa iyang dakong pasalamat kang Kuya Gov ang usa ka ginang nga si Lenie Batoon, nga taga-Brgy. Esperanza, gumikan sa tabang sa gobernador niadtong naospital ang iyang anak diin si Kuya Gov ang nibayad sa iyang dakong bayronon sa ospital.
“Akong dako kaayong pasalamat kang Kuya Gov kay sa pagpaopera sa akong anak, P36,000 iya gyung gikapaan tanan. Dako gyud kaayo ang akong pasalamat. Karon pa gyud ko nakapasalamat kang Governor Jubahib,” saysay ni Batoon.
Aron makunhoran o masolusyonan ang dakong epekto sa pagbaha sa probinsya, laraw karon ni Kuya Gov nga maghimo og artificial lake nga imontar sa nagkadaiyang flood prone area nga maoy mosalo sa kusog nga bul-og sa tubig baha gikan sa kabukiran.
Writer: Nestor Mata, Jr.Photos: Kuya Gov. Edwin I. Jubahib
