Taliwala sa tumang kainit sa panahon mipatigbabaw ang daw di matupngang abilidad, katakos ug hiyas sa mga PDL kon Persons Deprived of Liberty nga ilang gipaambit sa panapos nga programa sa usa ka bulang selebrasyon sa National Women's Month. Kini gipahinabo sa Davao Provincial Rehabilitation Center niadtong Marso 31.
Mga nagkadaiyang presentasyon sa mga kababaihan sama sa spoken poetry, cultural dance, community dance ug uban pa ang milingaw ug misulay sa ilang mga abilidad. Ang nasampit nga selebrasyon gitambongan ni Kapalong Mayor ug One DavNor Association of Women President Maria Theresa R. Timbol, DPRC-OIC Marilyn Erolon, Gale Guadalupe Mortillero, Assistant Provincial Administrator for Administration ug mao sab ang GAD Focal Chief, representante ni Kuya Gov Jubahib, mga relihiyosong sektor ug uban pa.
Si Mayor Timbol maoy pinasidunggang dinapit sa maong okasyon kinsa nag-ila sa mga kababaihan labi na kang DPRC-OIC Erolon sa katakos niini isip babae sa pagdumala sa maong rehabilitasyon.
"Babae, empowered nga gihatagan og dako kaayong responsibilidad sa pagdumala diri. Palakpakan nato si Maam. Sauna ang babae mag-apil-apil mohatag og opinyon, ingnon ka apil-apil man ka nga wala man kay labot. Pero karon makita nato paano ang bunga sa pagpaningkamot sa kababaihan nga apil gyud diay ang kababaihan sa kalinaw, sa paglambo sa atong mga nagkalain-laing munisipyo ug paglambo sa probinsya," sumala ni Mayor Timbol.
Atol sa maong aktibidad gilusad ang Davao del Norte PADO-PRC Manual. Kini ang dokumento nga magsilbing giya sa operasyon sa maong pasilidad labi na sa pag-ila sa mga katungod ug pribilehiyo sa mga PDL.
Gipasalamatan ni Erolon ang mga personalidad nga dako kaayo og gikatampo sa kalampusan sa gipaguwang manual ug labi na ang suporta sa gobernador.
"Emergency and contingency plans of the center in times of calamities and rights of the PDL and fair trials. I would like to take this opportunity to thank the following persons that made this journey possible, foremost to our Honorable Governor Edwin I. Jubahib," matud ni Erolon.
Samtang, gipresentar sab ang mga PDL products ug ang mga regalong nadawat sa mga kababaihan gikan sa mga partner stakeholders ug mga indibidwal.
Writer/Photos: Lorna P. Tripoli
