Duha ka benepisyaryo sa DavNor KAAGAPAY Fish Production ang nag-harvest sa ilang tilapia sa managlahing Purok sa Brgy. Katipunan, Kapalong, Davao del Norte, niadtong Marso 30, 2023.
Ang benepisyaryo nga si Samuel Urdaneta, ang Chairman sa Katipunan Fisherfolks Association nga taga-Purok 11, ni-harvest sa mokabat 30 kilos nga tilapia. Samtang si Edu Tio-ong benepisyaryo nga taga-Purok 1, ni-harvest sab sa mokabat 35 kilos nga red tilapia.
Sumala ni Chairman Urdaneta nga naengganyo siya sa pagpamuhi og isda gumikan sa dakong suporta nga gipakita sa probinsyal nga panggamhanan, diin nahilakip na ang fish production sa flagship program ni Governor Edwin “Kuya Gov” Jubahib, nga DavNor KAAGAPAY kon Kawsa sa Agrikultura ug Panginabuhian sa Barangay.
Dugang niya nga dakong tabang sa ilahang mga yanong mag-uuma ang maong programa sa gobernador kay nadugangan ang ilang kita nga sarang magamit sa inadlaw nga panginabuhi.
“Isa kini nga dako kaayong ikatabang nga makadugang sa atoang income. Ug isa pa pud niini, nagpasalamat pud ko sa atoang gobernador nga aduna siyay gigahin nga proyekto bahin niining pangisda para maengganyo ang ubang mga beneficiary nga kini diayng klase nga pagpamuhi sa isda dako diay kining ikatabang sa atoang panginabuhian, ilabi na karon nga bag-o pa lamang kita natangtang sa pandemya. Unya, salamat pud kaayo sa concern sa atong mga personnel, ilabi na sa BFAR nga kami gitagaan mi og higayon o opportunity nga makapamuhi niining maong mga isda,” sumala ni Urdaneta.
Gisaysay ni Chairman Urdaneta ang iyang kasinatian sa pipila ka bulan nga namuhi siya’g isda og isip chairman sa ilang asosasyon.
“Ang pagpamuhi sa isda dili bug-at ang imong obligasyon kun ibase nato sa pagpamuhi sa baboy ug isda, kay ang baboy mag-hand carry ka man. Ang isda mao ra ni magtuyoktuyok ka, magmonitor ka, motan-aw ka sa level sa tubig, ang imong pagkaon, ug unsay nahitabo sa imong palibot,” dugang sa chairman.
Dako ang kalipay sa mga benepisyaryo kay dili sila maglisud pagpangita sa mopalit sa ilang kuha nga isda sanglit duna nay nagsaad nga buyer sa ilang mga tilapia. Pipila lamang kini ka minuto sa ilang mga kamot gilayon kining gihatud ngadto sa ilang mga suki.
Ang maong kalihokan gitambongan sa mga personahe sa Provincial Agriculturist Office (PAGRO) nga gipangunahan ni Jomar Hadgerol, Aquaculturist II ug KAAGAPAY Staff sa Kapalong nga si Hardger Barcenas.
Sa kasamtangan, adunay 45 ka miyembro ang Katipunan Fisherfolks Association nga nakabenepisyo sa libreng firgerlings ug fry mash nga gihatag ni Kuya Gov ubos sa programang KAAGAPAY diin kasagaran kanila naka-harvest na sab.
Ang KAAGAPAY mao ang konkretong suporta ni Kuya Gov sa Food Security thrust ni President Ferdinand “Bongbong” Marcos, Jr.
Writer/Photos: Nestor H. Mata, Jr,
