Subay sa pagsaulog sa ika 72nd Founding Anniversary sa Department of Social Welfare and Development (DSWD), gipang-apod apod ngadto sa mga benepisyaryo sa Pantawid Pamilyang Pilipino Program (4Ps) sa Barangay Mambing, New Corella, Davao del Norte ang sobra 50 ka mga solar transistor radio.
Pinaagi sa usa ka simpleng seremonyas niadtong Marso 30, 2023 sa Barangay Multi-purpose Gym, malipayon ug mapasalamaton nga gidawat sa mga benepisyaryo ang regalo nga gihatag kanila ni Governor Edwin “Kuya Gov” Jubahib pinaagi ni Provincial Information Officer Dr. Mervin Jay Suaybaguio.
"Gituyo gayud namo og hatag ang mga radyo sa inyuha para dili mo maulahi sa importanteng impormasyon nga dapat ninyong mahibal-an dinha sa atong katilingban...daghan kaayo’g programa ang gobyerno nga kung dili ta makabalo, dili ta maka-akses. Maong nihatag mi aning mga radyo aron masayod kamo unsaon pag akses sa serbisyo sa atong panggamhanan," pagpasabot ni Suaybaguio.
Samtang, gihatagan og gibug-aton ni DSWD XI – Davao del Norte Provincial Operations Office, Provincial Link Blaissel Jane Fernandez ang mga nahimo sa buhatan sa mga katuigan nga hinungdan sa dakong kausaban sa kinabuhi sa mga benepisyaro, ilabi na sa 4Ps. Gipasalig sab sa Provincial Link nga mas palig-onon pa ang implementasyon sa mga programa sa panggamhanan aron mas mapalapdan pa kini og mas daghan ang matabangan.
Gipahimuslan ni Cherry R. Ricaforte, usa sa mga benepisyaryo sa 4Ps nga nakadawat sa solar transistor radio, ang panahon aron ipadangat ang kinasing-kasing nga pagpasalamat sa gobyerno, ilabi na sa probinsyal nga panggamhanan sa Davao del Norte.
Mapasigarbohon sab nga gisaysay ni Punong Barangay Gerry Abonero kung unsa ang mga kabag-ohan nga ilang natagamtaman tungod sa daghang mga programa ug proyekto nga gibubo kanila gikan sa nasyonal nga panggamhanan ilabi na ang DSWD ug probinsyal nga panggamhanan, ubos sa liderato ni Governor Jubahib.
Gitambongan ang maong tigom sa mga opisyales sa barangay, DSWD personnel sa probinsya ug sa lungod sa New Corella, representante sa Provincial Social Welfare and Development Office Lanny Guinit, ug mga personahe sa PICKMO.
Gipahingusgan sa DavNor pinaagi sa Provincial Information, Communication and Knowledge Management (PICKMO) ang pagpa-abot sa sakto nga impormasyon kabahin sa mga katikaran sa panggamhanan. Sa kasamtangan, dunay upat ka tinubdan sa mga balita ug impormasyon nga gidumalaan sa probinsya: DXNR Radio 91.1 FM, PTV DavNor, One DavNor News, ug One DavNor Network. Gilauman nga sa pagpanghatag sa mga solar transistor radio, mas makabaton og saktong impormasyon ang katawhan nga magamit nila aron mas mapalambo pa ang ilang mga kinabuhi.
Writers:Harold Evidientes
Mervin Jay Suaybaguio
