Kapin 5,000 ka mga Dabaonon gikan sa nagkalainlaing sektor ang misalmot sa Solidarity Rally aron sa pagpakita'g suporta sa tulo ka mga balaudnon nga nagtumong sa pagpalapad sa prangkisa sa Davao Light and Power Company, Inc. (DLPC) sa tibuok Davao del Norte.
Kini aron sulbaron ang dugay nang mulo ug yangungo sa katawhan batok sa hinay nga kuryente, mahal nga singil ug way ayo nga serbisyo sa Northern Davao Electric Cooperative (Nordeco), nga kanhi Davao del Norte Electric Cooperative (Daneco).
Apil niini nga mga balaudnon ang House Bill (HB) 5077 nga gi-file ni Davao del Norte 1st District Congressman Pantaleon D. Alvarez, HB 6740 nga gi-file ni Congresswoman Margarita Ignacia B. Nograles sa PBA Partylist, ug HB 7047 ni Congressman Sandro L. Gonzales sa MARINO Partylist.
Nagtumong ang maong mga balaudnon sa pag-expand sa prangkisa sa DLPC sa probinsya aron maapil na niini ang Tagum City, Asuncion, Kapalong, New Corella, San Isidro, Talaingod, ug ang Island Garden City of Samal (IGaCoS).
Kining tulo ka mga balaudnon nag-ripaso sa House Bill (HB) 10554 nga gipasa na unta sa Kongreso, pero gi-veto ni Pangulong Ferdinand "Bongbong" Marcos niadtong Hulyo niaging tuig.
Apan, nagatoo si Governor Edwin "Kuya Gov" Jubahib nga karong higayona paminawon na sa presidente ang singgit sa katawhan alang sa kabag-ohan, uban sa suporta sa mga kongresista ug mga senador sa nasud.
Kauban ni Kuya Gov sa motorcade sa kapin 100 ka mga sakyanan ug sa rally aron mopasibaw sa ilang suporta sa maong mga balaudnon ang mga local officials ug representante sa nagkadaiyang sektor aron masulbad na sa hingpit ang dugay nang problema sa katawhan sa maot nga serbisyo sa Nordeco.
Gawas sa gobernador, namulong sab sa maong rally sila Board Member Nicandro Suaybaguio, Jr., Kapalong Mayor Maria Theresa Timbol, Tagum City Vice Mayor Allan Rellon, ang Presidente sa Provincial Culture, Tourism and Arts Council nga si Araceli Ayuste, ang Managing Director sa Davao Provinces Rural Development Institute, Inc. nga si Perfecto Urdaneta, ang Executive Director sa SILDAP, Southern Mindanao Rande Bayate, ug ang Purok Leader sa Gupitan sa lungsod sa Kapalong nga si Datu Lito Sambag.
Una nang nagrali ang katawhan ug mga negosyante sa IGaCoS ug Tagum City batok sa Nordeco. Ang Regional Development Council (RDC) mipasa na sab og usa ka resolusyon aron pagsuporta sa maong mga balaudnon, alang sa pag-asdang sa ekonomiya sa probinsya.
Writer: Noel Baguio
