Gipahimangnoan ni Davao del Norte Governor Edwin I. Jubahib ang mga opisyal ug empleyado sa probinsya nga likayan ang paggamit sa mga sakyanan sa gobyerno alang sa personal nga katuyoan, ilabi na gawas sa oras sa pagtrabaho.
Sa iyang pakigpulong atol sa Capitol Monthly Convocation Program sa unang Lunes sa Abril, nagpahinumdom ang gobernador sa mga kawani sa probinsya batok sa paggamit sa government service vehicles alang sa mga katuyoan gawas sa opisyal nga lakaw ug limitahan ang paggamit niini sa mga importanteng kalihokan lamang.
“Ug kung magparty-party, ayaw gamita ang service sa gobyerno,” matud ni Gov Jubahib.
Gibatbat ni Jubahib ang hugot nga pahimangno nunot sa resulta sa inisyal nga imbestigasyon nga gihimo sa iyang opisina sa bag-ong Isuzu D-Max pick-up nga giisyu ngadto sa usa ka miyembro sa Sangguniang Panlalawigan (SP), nga naaksidente sa Tagum City niadtong Marso 21, 2023.
Kahinumdoman nga ang service vehicle ni Board Member Emerson Dave Silutan nabangga sa sementong koral sa Suaybaguio-Riña Elementary School pasado alas 4:00 sa kaadlawon niadtong Marso 21. Sumala ni BM Silutan sa iyang privilege speech atol sa regular session sa Sangguniang Panlalawigan niadtong Marso 27, nga uban siya, sa passenger seat, sa pagkahitabo sa maong aksidente.
Apan, sukwahi sa iyang mga pangangkon, ang CCTV footage sa eskwelahan nagpakita nga ang opisyal wala nahilakip sa tulo ka mga menor de edad nga miguwa gikan sa nabangga nga sakyanan.
Ang report sa school security guard nga nag-duty niadtong tungora nagbutyag usab nga ang tulo ka menor de edad ubos sa impluwensya sa ilimnong makahubog.
“We are very strict on our policy that only authorized drivers are allowed to drive government vehicles… If it is not related to your official function, just leave the service vehicle to the designated parking area or to your home,” sumala ni Kuya Gov.
Ubos sa balaod, ang paggamit sa mga sakyanan sa gobyerno gitugotan lamang alang sa opisyal nga transaksyon ug kinahanglan nga awtorisado pinaagi sa usa ka "trip ticket," nga naglangkob sa destinasyon, katuyoan ug gidugayon sa pagbiyahe.
Ang balaod usab nagdili sa paggamit sa maong mga sakyanan alang sa personal nga paggamit sa mga opisyal ug ilang mga pamilya o mga higala, lakip na ang pagdala sa ilang kapikas o mga anak sa opisina ug eskwelahan.
Miingon si Jubahib nga ang nasayop nga opisyal, nga mao ang Sangguniang Kabataan Federation President sa probinsiya, kinahanglang manubag sa iyang gibuhat, samtang iya sab bayaran ang danyos sa sakyanan ug sa eskwelahan.
“Managot sa taong-bayan kung sino ang may kasalanan,” sigon niya.
Writer: Noel BaguioProto Credits: The Mindanet balita
