Dasig ang mga benepisyaryo sa gipahinabong oryentasyon sa usa sa mga inisyatibong programa ni Kuya Gov Edwin Jubahib nga pagtubag sa kakulangon sa pagpangempleyo. Libo kapin ang mitambong sa Risk Resiliency Program thru Cash for Work on Climate Change Adaptation and Mitigation kon RRP-CCAM didto sa Sto. Tomas Cultural Gym niadtong Abril 5, 2023.
Gipangunahan sa DSWD Region XI, PSWDO, PAGRO, MSWDO, representante sa gobernador ug uban pang ahensiya aron sa pagpasabot kung unsay angayan nilang buhaton.
Napulo ka adlaw ang ilang pagserbisyo sa komunidad nga gisugdan Abril 11. Apan sanglit kwentada nang daan ang adlaw sa pagpaminaw sa oryentasyon mamahimong siyam na lamang ka adlaw ang ilang pagatrabahoan. Lakip niini ang pagtanom og mga punoang kahoy, paglimpisa ug pagpanglimpyo sa mga kanal sa kabarangayan.
Modawat sila’g tag-P4,380 isip suhol sa 10 ka mga adlaw sa pagkugi. Gibutyag ni PSWDO Focal Person Lanny Guinit nga ang ilang bayad sa serbisyo madawat sa katapusang semana sa Abril o unang semana sa Mayo 2023.
"Nagtoo kami nga maging successful gyud atong 10 days nga trabaho. Daghang salamat sa DSWD sa partnership sa ilang gipaabot kanato through sa provincial government pinaagi kang Kuya Gov Edwin I. Jubahib," sumala ni Guinit.
Samtang gikanayon sa representante ni Kuya Gov nga naningkamot ang gobernador nga manungkit og pondo sa rehiyonal ug nasyonal aron sa pagpatuman sa mga programa sama sa CCAM labi na ang pagtabang sa mga nanginahanglan og trabaho. Uban kanila mga miyembro na usab sa KAAGAPAY Program sa gobernador. Sa mensaheng gipaabot sa ni Kuya Gov ngadto sa mga benepisyaryo, siya nagpahimangno sa saktong paggamit sa salapi sa higayon nga sila mo "pay-out".
"Kini nga programa nga hatag ni Kuya Gov, gihatag sa inyoha para magamit. Pwede i-capital, sa inyong mga anak, sa inyong personal, sa inyong mga basic needs. Gusto ni Kuya Gov nga bisan dili tanan mahatagan, mahatagan dapat ang nagkinahanglan," pagpasabot ni Montero.
Nidalit usab og init ug lamiang lugaw si Kuya Gov alang sa mga katawhan nga nagtambong sa maong tigum.
Writer: Lorna P. TripoliPhotos: Charlie Verdijo
