Gipahigayon ang Philippine Rural Development Project – Scale Up, usa sa mga flagship program sa Department of Agriculture sa VIP Clubhouse, DNSTC, Mankilam, Tagum City, niadtong Marso 29, 2023.
Gitambongan kini ni Governor Edwin “Kuya Gov” Jubahib, kauban ang mga department head sa kapitolyo nga gipangunahan ni Provincial Administrator Engr. Josie Jean Rabanoz. Nitambong sab si Abel James Monteagudo, ang Regional Executive Director/Project Director sa DA Region XI. Kalakip sab sa mga partisipante ang mga representante sa mga hepe ehekutibo sa walo (8) ka lungsod ug tulo (3) ka siyudad nga sakop ning probinsya.
Gihisgotan sa maong tapok ang mga lakang sa Department of Agriculture alang sa pagpakusog sa pag-abri sa mga kadalanan sa kabukiran aron mapadali ang paghatod sa mga nag-unang produkto sa mga mag-uuma padulong sa merkado. Sa ingon nga paagi mahatagan og kasulbaran ang problema nga dugay nang gihambin sa mga mag-uuma ug madugangan sab ang gidaghanon sa suplay sa pagkaon sa probinsya.
Atol sa maong panagtigum, gianunsyo ni Monteagudo ang Memorandum of Agreement tali sa Pilipinas ug Peoples Republic of China. Unod niini ang pag-export sa Pilipinas og durian ngadto sa maong nasud nga matud pa, sugdan na sa labing daling panahon.
Giaghat niya ang mga Dabaonon sa pagpangita sa mga consolidator aron maapil ang ilang durian tungod kay dinaghan ang angkaton sa China. Dugang pa niya, nga puyat ra gyud ang variety sa durian nga kuhaon sa China, gumikan kay dili sila ganahan sa ubang klase, apan dili mabalaka ang nagtanom sa lahi nga variety sanglit mahalin pa man kini dinhi sa nasud.
“Some of you would be engaging in such and some of you would join the bandwagon of sending durian to China. Maybe you have your own farm, i-enrol ninyo sa mga exporter didto sa Davao City, kay di man ‘ta maka-export og usa ka container lang, kay di man sila modawat og usa ka container lang. Mao nay nakalami sa China kay kung mag-istorya mo dinaghan gyud na siya. Karon pa lang, daghan nang nagreklamo nga mahurot ang atong durian diri sir, ‘Wala nay durian diri. Momahal na ang durian.’ Dili pud siguro ingon niana kay naa pa may laing variety. In fact, kung ang puyat madala sa China, aw bida ang aroncillo diri kay siya may mabilin. Ug ang kob siguro ug uban pang variety,” sulti ni Monteagudo.
Gipasalamatan ni Kuya Gov ang Department of Agriculture ug nagpadayag sa iyang dakong kalipay sa makanunayong suporta sa nasyonal nga ahensya dinhi sa probinsya gumikan sa pagbubo niini og dakong pondo alang sa katukoran sa nagkadaiyang proyekto nga gipondohan sa PRDP.
Gisaysay sa gobernador ang kalisod nga nasinatian sa mga mag-uuma samtang sila mopagawas sa ilang mga abot padulong sa merkado gumikan sa kalisod sa ilang agianan. Apan tungod matud pa sa maong programa, dako ang matabang niini nga molambo ang hilit nga mga barangay ug dali na silang makabaligya sa ilang mga produkto.
“The Province of Davao del Norte is very thankful of this PRDP Program from our National Government because of this road program. I consider this a high valued project for the province because this program provides a solution to our problem of road condition going to the communities especially the far-flung areas and to all the farms. It addresses the problem of our investor at the same time to all our farmers and our constituents in the Province of Davao del Norte,” sumala ni Gov Jubahib.
Gisugyot ni Kuya Gov sa mga personahe sa DA Region XI, nga padak-an pa ang gibag-on sa kalsada nga pagahimuon, gikan sa 6 inches ngadto sa 10 inches kung mahimo. Sanglit, matud sa gobernador, nagkadugay ang panahon, nagkadagko sab ang sakyanan nga moagi sa maong mga kadalanan. Aron mas molungtad pa ang maong mga kalsada ug mapahimuslan sa dugay’ng panahon.
Writer/Photos: Nestor H. Mata, Jr.
