Sa tingoha nga mas palapdan pa ang KUYA GOB development agenda may kalabotan sa Universal Health & Social Services, naghimo’g lakang ang probinsyal nga panggamhanan pinaagi sa immersion sa mga nursing academic institution ngadto sa tulo ka mga government district hospital sa Davao del Norte. Kini ang tumong sa gipahinabong Orientation for School affiliates nga gidumalahan sa Provincial Economic Enterprise Development Office (PEEDO), sa PGO Conference Room, niadtong Abril 14, 2023.

Mitambong ang mga representante sa mga kolehiyong tulunghaan sama sa Tagum Doctor's College, St. Mary's College of Tagum, Arriesgado College Foundation Inc., ug North Davao College sa oryentasyon.

Katimbang sa PEEDO sa pagpahigayon sa programa sila si Atty. Dexter Caligdong sa PLO, mga nagdumala sa Carmen, Kapalong ug Island Garden City of Samal district hospital, Luntiang Paraiso Regional Rehabilitation Centers kon LPRRC, Atty. Eva Estabillo kinsa nagrepresentar kang Kuya Gov Edwin I. Jubahib ug uban pa. Ubay-ubay usab nga mga nursing student ang nagpakita sa ilang suporta niadtong tungora.

Sa maong tigum, gitumbok ang mga regulasyon sa mga government hospital labi na ang saktong pagtratar sa mga masakiton, ug ang data privacy act agi’g pagsilsil sa alimpatakan sa mga nursing internship students nga protektahan ang matag personal nga impormasyon sa mga pasyente. Gihisgutan sab ang kaimportante sa hugot nga pagbawal sa mga butang ginadili sa mga residente labi na gayud sa Luntian facility. Gilauman nga ipaabot nila sa ilang mga estudyante ang mga gibatbat nga pahinumdom sa nagkadaiyang ahensiya sa gobyerno una mosugod sa ilang mga duty ngadto sa mga probinsyal nga ospital.

Gikanayon ni PEEDO Head Dennis Devilleres nga sila nga mga intern kabahin na sa labor force sa probinsya sa paghatud sa health services program ni Kuya Gov Edwin I. Jubahib. Makamenus kini sa galastuon sa bahin sa mga ginikanan sa mga nursing student sanglit dili na kinahanglan nga moadto pa’g Davao City alang sa internship.

Ang mga government facilities dako’g kontribusyon aron mabaid ang kahibalo ug abilidad sa mga nahisgotang estudyante. Kini silbing tabang sa gobernador kanila tungod kay naglaum si Kuya Gov nga makabaton ang probinsya’g mga nurse nga dunay igong kasinatian sa pag-atiman sa mga pasyente labi na nga anaa pa gihapon ang mga variants sa covid 19.

"We are very sad right now. Nakita na pud nato nga adunay insurgence na pud. In fact, in Davao City there's an increase in our covid infection. Naa na pud another variant. I think mao na siguro ning atong new normal. Covid variant, subvariants and another subvariants, so we need really our nurses and our doctors, our paralegals to help us survive sa province. Maong balikon nako, mao ning usa sa mga prayoridad sa atong gobernadora, ang health sector," sulti ni Devilleres.

Sa pikas bahin, gilauman nga himoon ang ceremonial signing sa Memorandum of Agreement tali sa probinsyal nga panggamhanan ug sa mga tulunghaan sa dili madugay, subay sa Sangguniang Panlalawigan Resolution No. 791 series of 2019. Ang MOA mas magpalig-on sa tumong nga mahatod ang saktong serbisyong panglawas sa mga Dabaonon pinaagi sa pakigpartner sa mga private academic institutions.

Writer/Photo: Lorna P. Tripoli

 

 

 

DavNor News

https://www.high-endrolex.com/26
https://www.high-endrolex.com/26