Aminado ang Davao del Norte Provincial Police Office nga maglisud gyud ang kapulisan kung wala ang suporta sa Lokal nga Panggamhanan sa siyudad sa Tagum.
“Among dawaton nga dunay dakong resulta ang desisyon sa mayor ngadto sa kapulisan. Maglisud gyud kung wala ang suporta gikan sa city government,” butyag ni Provincial Director PCol Antonio D. Alberio, Jr. atol sa gipahigayong press conference sa DNPPO kaganinang buntag.
Bag-ohay pa lamang, nagpagawas og pahayag si Tagum City Mayor Rey T. Uy, nga bawion ang suporta sa Tagum PNP tungod sa pagkadismaya niini human sa sagunsong panghitabo sa siyudad labi na ang “kalit” nga pagpuli kang PLtCol Edgardo Bernardo isip hepe sa maong istasyon.
Gikasubo ni PD Alberio ang pagkawala sa suporta sa LGU Tagum sanglit dako kaayo kini’g epekto sa naandang operasyon sa ilang buhatan. Apan giklaro sa opisyal nga ang desisyon sa “change of command” naggikan sa regional office. Igo lamang kuno silang nisunod ug niimplementar kung unsa ang mando sa ibabaw.
Sumala sa provincial director nga wala gibase ang paghulip sa giingong “one strike policy”. Ugaling dunay mahitabo sa Eight Focus Crimes (murder, homicide, robbery, carnapping, theft, rape, physical injury, ug illegal drugs) sa area of responsibility sa usa ka chief of police, ipatawag kini sa DNPPO aron ipailawom sa weekly EMPO (Enhance Managing Police Operations) – unsa pagkahitabo sa krimen, kung unsa ang gihimong lakang, ug kung nasolusyonan ba.
Human sa nasangpit nga ebalwasyon, sunod nga mohimo og monthly assessment ang regional office nga posibleng maoy gibasehan sa paghulip sa hepe.
Kalabot sa isyu sa pag-bypass kang Mayor Uy nga wala kuno nila na-inform, gitubag kini ni PD Alberio nga napahibalo nila ang mayor. Gani, naistorya mismo sa forwarding police officer nga mao usab ang second in command sa DNPPO nga si PLtCol Jay G. Dema-ala si Mayor Uy kabahin sa maong lakang.
Gipanghimakak usab ni PD Alberio ang alegasyon nga wala gapatrolya ang kapulisan. Sakit, matud pa, sa ilang bahin nga sultihan og ing-ana nga nitabang man ang provincial headquarters sa adlaw-adlaw nga pagpatrolya nga misangpot pa gani sa pagkaangol sa duha nila ka personahe sa duha ka managlahing operasyon.
Apan isip pagrespeto sa mayor sa Tagum, sulti ni PD Alberio, nga maningkamot gihapon sila matabangan ang kapulisan aduna may suporta sa lokal nga panggamhanan o wala. Magpadayon ang ilang tinud-anay nga serbisyo aron mamintenar ang peace and order sa probinsya labi na sa siyudad sa Tagum.
Nanghinaut ang pwersa sa DNPPO nga masabtan sa mayor ang nahimong desisyon sa regional office ug maningkamot sila sa pagpasabot kaniya sanglit ang katawhan ra gihapon ang mag-antos. (junnex)
