Gipahigayon ang pormal Turn-over and Acceptance Ceremony of Cattle Production sa 42 ka mga mag-uuma nga gikan sa Brgy. Semong, Brgy. Gupitan, ug Brgy. Tiburcia, Kapalong, Davao del Norte, niadtong Mayo 9, 2023.
Gipangunahan kini ni Provincial Veterinary Officer - OIC Dr. Dennis Sumaoy, kauban sila Asst. Provincial Engineer Tessie Ababon, Executive Assistant Jemuel Melmida isip representante ni Governor Edwin “Kuya Gov” Jubahib, ug Board Member Emmanuel “Mawe” Pamisaran, Chairman sa Committee on Agrarian Reform, Agriculture and Food sa Sangguniang Panlalawigan.
Gisaysay ni Engr. Ababon nga ang pondo sa maong proyekto nasungkit sa Probinsyal nga Panggamhanan gikan sa Office of the Presidential Adviser on Peace, Reconciliation and Unity (OPAPRU) ubos sa PAyapa at MAsaganang PamayaNAn (PAMANA) Program. Tulo ka tuig kining buhion sa mga benepisyaryo, human makaanak, ibalhin na usab kini sa laing benepisyaryo.
Sumala ni Board Member Pamisaran nga ang maong programa gisugdan sa panahon pa ni kanhi Presidente Rodrigo Duterte ug pinaagi sa pagpaningkamot ni Governor Edwin “Kuya Gov” Jubahib, gipadayon ang pagpanghatag sa maong mga baka nga libre ngadto sa piniling benepisyaryo. Giawhag ni Pamisaran ang mga benepisyaryo sa pag-amping sa maong mga baka aron mosanay kini ug mahatag pa sa ubang benepisyaryo.
“Ang importante natagamtaman nato ang mga programa sa atong panggobyerno nga dili lamang sa ayuda sa crops nga hisgutanan kung dili ania pud dinhi sa kabuhayan sa livestock ug uban pa nga mga programa. Panghinaut lang sa atong panggobyerno nga ato gyung ampingan ang maong baka, nga makaanak siya, unya modaghan siya, ug mosanay aron ato pong mapaambit sa uban nga mahimong recipient,”sumala ni BM Pamisan.
Sa mensahe ni Kuya Gov pinaagi ni Executive Assistant Jemuel Milmeda, iyang gisaysay ang pagpaningkamot ni Kuya Gov aron makahatag og mga programa ug hinanaling serbisyo sa mga Dabaonon ilabi na niadtong naghilaid sa kalisud.
Dugang niya nga wala gyuy hunong ang gobernador sa pagpangita og mga pamaagi kalakip ang pagpanungkit og pondo gikan sa kaulohang Manila.
Gipasalig ni Dr. Sumaoy nga sila andam sa pagtubag sa tanang mga hangyo sa mga benepisyaryo kabahin sa pagpa-checkup sa ilang mga baka kon ugaling man mamatikdan nga aduna kini gihambin nga sakit. Dili magpanuko matud pa sa pagreport sa ilahang buhaton aron diha-diha dayon mahatagan og igong intervention ug medication nga makapahupay sa sakit sa ilang hayop.
Dugang ni Sumaoy nga sila na ang bahala sa pagpahigayon og artificial insemination aron dili na maglisud ang mga benepisyaryo sa pagpangita’g semilya nga ilang magamit sa pagpasanay sa maong mga baka.
“Ang opisina sa veterinary office ang magpaluyo referring to animal health services. Ayaw mo’g panuko or kabalaka og sampit, through text moabot sa Municipal Agriculturist i-forward sa amoa para moresponde sa panginahanglanon sa mga hayop. And, kining atong mga hayop nasayod man ta nga puro ni sila babae. Naa tay teknolohiya, gamitan nato og artificial insemination. Ato siyang hulaton nga moabot sa tamang edad para andam na modawat ang iyang matres sa atong i-inject nga semilya,”matud ni Dr. Sumaoy.
Nagpaabot sa ilang pasalamat ang mga benepisyaryo ngadto kang Kuya Gov gumikan sa way puas nga tabang ug suporta nga iyang gihatag ngadto kanila.
“Daghang salamat ni Kuya Gov sa iyang baka nga gihatag sa mga mag-uuma,”buntag ni Joselito Lagumbay.
“Daghan gyud kaayong salamat kay Gov ug sa tanan nga nag-sponsor ani, kang Mayor ug kang Kapitan. Dako kaayo ang akong kalipay nga nakadawat ko aning ilang programa sa baka. Dako kaayo ni’g tabang sa akong pamilya,”pasalamat ni Ervin Quilla.
Kahinumdoman nga bag-ohay pa lamang, gitunol sa Probinsyal nga Panggamahan ang mokabat 42 ka mga baka sa mga mag-uuma sa tulo ka barangay sa lungsod sa Talaingod.
Writer/Photos: Nestor Mata, Jr.
