Gipangunahan ni Governor Edwin “Kuya Gov” Jubahib ang Joint PPOC-PTF-ELCAC meeting sa Probinsya sa Davao del Norte, sa VIP Clubhouse, DNSTC, Mankilam, Tagum City, niadtong Mayo 25, 2023.

Gitambongan kini sa mga kadagkoang opisyal sa kasundalohan nga gipangunahan ni 10th Infantry Division Commander MGen. Jose Eriel M. Niembra, kauban si 1001st Brigade Commander Col. Felix Ronnie B. Babac ug 1003rd Brigade Commander Col. Marion Angcao, kalakip sab si PNP Provincial Director PCol Antonio Alberio, PDEA Provincial Officer Julius Magdadaro, DILG OIC-Provincial Director Jonathan J. Leybag, mga department head sa kapitolyo nga gipangunahan ni Provincial Administrator Engr. Josie Jean Rabanoz, mga representante gikan sa nagkadaiyang national agencies ug LGUs sakop sa probinsya.

Sa mensahe ni Col. Babac, iyang gibatbat ang kamahinungdanon sa padayong pag-atiman sa mga Friend’s Rescued (FRs) aron dili na kini mobalik sa kalihokan sa New People’s Army (NPA). Kinahanglan usab, matud pa, nga mahatag kanila ang tanang mga gisaad sa gobyerno niadtong panahon nga anaa pa sila sa negosasyon alang sa ilang pagbalik sa sabakan sa balaud.

“We need the radicalization. We need to continue to engage the FR’s. We need to assure them that the commitment of the government when we negotiated in their surrender is still be there. Dili nato sila pwedw pabayaan,” sumala ni Col. Babac.

Gipasidunggan ni Col. Angcao ang Probinsyal nga Panggamhanan sa Davao del Norte ubos sa liderato ni Kuya Gov gumikan sa pagdeklara sa probinsya nga insurgency free nga hapit na mag-tuig karong Hunyo 13. Gikanayon niya nga maglisud na sa pagsulod sa Talaingod ang mga rebeldeng NPA gumikan sa presensya sa liboan ka mga bagani nga ilang katambayayong sa pagmonitor sa tanang mga sitio sa maong lungsod.

Apan padayon gihapon ang mga kasundalohan sa paghimo sa angayan nilang buhaton alang sa paglahutay isip insurgency free. Dugang niya nga dili angayang luagan ang seguridad sa probinsya sanglit anaa lamang sa mga utlanan tali sa kasikbit nga probinsya ang mga rebelde.

“Never the less our troupe has still not complacent even though there were no reported or monitored enemy activity because of the following conditions. There are CTG still operating in our boundaries particularly in the boundaries of Cotabato and in Bukidnon. Sa Cotabato at Bukidnon, natitira pa po dyan yong weakened Guerilla Front 57. Nasa boundary lang natin yon,” matud ni Col. Angcao.

Atol sa maong panagtigom, mayorya sa konseho ang miaproba sa Supplemental Peace and Order and Public Safety Plan (POPS Plan) alang sa tuig 2023 hangtud 2025, nga gipresentar ni Acting Provincial Planning and Development Coordinator Engr. Maria Hazel Zafra.

Samtang gihatagan og gibug-aton ni Kuya Gov ang paghatag og malungtarong solusyon sa problema sa abaca sa mga IP’s sa lungsod sa Talaingod ug ang pagpangandam sa probinsya alang sa umalabot nga hulaw nga moigo sa nasud.

Writer/Photos: Nestor Mata, Jr.