Gipaniguro ni Davao del Norte Provincial Sports and Youth Development Officer Giovanni Gulanes nga sakto ang suporta sa probinsyal nga panggamhanan alang sa medikal ug pagkaon sa mga delegado nga nakiglahugay sa pito ka sporting event sa Pre-National Qualifying Meet alang sa Palarong Pambansa 2023.
Matud ni Gulanes atol sa Press Conference kagahapon nga mismong si Gobernador Edwin “Kuya Gov” Jubahib ang nangunay sa pagdumala sa mga miting aron maplastar ang maong dakong kalihokan.
Kahinumdoman, bag-o pa lang nahuman ang pag-host sa probinsya sa Davao del Norte sa DAVRAA Meet niadtong Abril ug karon host na usab kini sa PNQM o Mindanao leg alang sa pagpili og mga atleta nga mo-qualify alang sa nagsing-abot nga Palarong Pambansa nga pagahimuon sa bulan sa Hulyo 2023 sa Marikina City.
Gibutyag ni Gulanes nga dako kini kaayong hagit, sa makausa pa, alang sa probinsya nga diri gipahinabo ang pinakaunang PNQM. Nagpasabot kini sa dugang paglambo sa dagan sa ekonomiya labi na sa siyudad sa Tagum ug ang pagsalig sa Department of Education gumikan sa hitsas nga mga kahimanan o ekipo sa isports ug halapad nga venue subay sa nakalatid nga standard. Kasayran nga ang probinsya nasulayan na sa dagkong mga event labi na sa natad sa paugnat sa kusog.
Dugang ni Gulanes nga nakig-alayon usab ang probinsya sa Davao Regional Medical Center, sa PNP ug uban pang ahensiya alang sa seguridad sa mga delegado. Ang probinsya pinaagi sa PSYDO nagpromotar sa "Kalaro Kita, Hindi Kalaban", alang sa maayong relasyon sa matag usa nga nisalmot sa kompetisyon.
Pormal nga giabliihan ang seremonya kagahapon pinaagi ni Francis Cesar Bringas, DepEd Assistant Secretary for Field Operation, sa DavNor Sports Complex ug gitambongan sa representante ni Kuya Gov Jubahib, mga opisyal, coaches, mga kawani sa DepEd sa nagkadaiyang rehiyon ug uban pa.
Gibanabanaang 2,000 ka mga delegado ang niabot sa nasangpit nga seremonya gikan sa lima ka mga rehiyon sa Mindanao nga magsangka ubos sa Cluster 4 nga gilangkoban sa Northern Mindanao (Region X), Davao (Region XI), Socsargen (Region XII), Caraga (Region XIII) ug Bangsamoro Autonomous Region in Muslim Mindanao (BARMM).
Ang mopatigbabaw nga Top 2 sa mga regional delegations maoy mamahimong cluster advance alang sa Palarong Pambansa 2023 nga morepresenta sa Mindanao.
Writer: Ma. Lorna P. Tripoli
