Gamay man ang budget sa Confidential Fund ni Kuya Gov Edwin Jubahib niining panahona nga naaprobahan sa Sangguniang Panlalawigan pinaagi sa Resolution No. 9 Series of 2023 sukwahi gikan sa orihinal nga budget nga giduso sa ehekutibo, apan dili kini babag aron padayong masuportahan ang mga programang pangkalinaw sa probinsya. Atol sa Provincial Peace and Order Council Quarterly Meeting niadtong Hunyo 20, usa karesolutionang gipasa ug giaprobahan sa PPOC. Nagtugot kini sa gobernador isip chairperson sa maong council sa pagpagula ug paggamit sa confidential fund sa probinsya kantidad P25 milyones alang sa pagsuporta sa mga peace and order program.
"Sa P25M gamay gyud kaayo na compare sa mga needs nato to sustain this province as insurgency-free and liveable province. Then ang P25M ituyok nimo sa entire province sa 223 Barangay, perti gyud na siyang lisura. Pero mao na nga pangitaan lang nato og pamaagi aron magpabiling maprotektahan nato ang mga katawhan sa probinsya," matud ni Gobernador Jubahib.
Ang maong panagtigom gitambongan nila 1003rd Brigade Commander Col. Marion T. Angcao, PCol. Antonio Alberio Jr, Mayor Maria Theresa Timbol sa Kapalong, Mayor Jonnie Libayao sa Talaingod, Provincial Administrator Engr. Josie Jean Rabanoz, Vice Gov De Carlo Uy, pipila ka board members, mga representante sa ubang LGU's, representante ni Congressman Bebot Alvarez ug uban pa.
Nagpadayag sa iyang kadismaya si Kapalong Mayor Timbol sa pamunoan sa Sanggunian Panlalawigan gumikan sa P25 milyones lamang ang giaprobahan nga confidential fund alang sa gobernador sanglit, sumala pa niya, tanang problema ma-insurhensiya man, pagpalit sa impormasyon batok kriminalidad ug uban pa, tanan gisagubang sa gobernador ug igong pondo ang labing gikinahanglan niini aron sa pagsustiner sa mga peace and order program.
Sa susamang miting, gireport sab ni PSWD Officer Rosalinda Rapista ang pagkadelatar sa pagpuyo sa 41 ka mga Friends Rescued o surrenderees ngadto sa housing project nga nahimutang sa Barangay Cuambogan, siyudad sa Tagum gumikan sa pipila ka mga rason sama sa kakulangon sa mga papeles niini gikan sa NHA ug ang wala pa nahumang mga housing unit.
Tungod niini, nadesisyonan sa gobernador nga pagahimuon ang hiniusang inspection sa maong proyekto pinaagi sa nagkadaiyang ahensiya sama sa NHA, PSWD, PNP ug uban pang sektor aron sa pagsuta sa suportang gikinahanglan sa mga Friends Rescued.
Writer/Photo: Ma. Lorna P. Tripoli
