Gidugok sa gatosan ka mga partisipante ang Kadagayaan Festival 2023 Swimming Competition nga naggikan sa nagkadaiyang dapit sa Rehiyon Onse ug Mindanao nga gipahinabo sa DavNor Sports and Tourism Complex, Mankilam, Tagum City, niadtong Hunyo 24. Ang mga partisipante gibahin sa duha ka mga kategorya sama sa Inter-Club Novice ug Amateur gikan sais anyos, nuwebe anyos, ug 16 anyos pataas.

Kini kabahin sa selebrasyon sa nagsing-abot nga ika-56 ka tuig nga sumad sa kamugnaan sa Davao del Norte isip probinsya human nasiak gikan sa Davao City tuig 1967 Hulyo Uno.

Nagpadayag sa iyang pasalamat si Provincial Sports Youth and Development Office (PSYDO) Head Giovanni Gulanes sa dasig nga partisipasyon sa mga competitors. Gibatbat niya ang mainitong suporta sa maayong panglawas nga programa ni Gobernador Edwin “Kuya Gov” Jubahib ug ang suporta alang sa pagpaugnat sa kusog pinaagi sa paghitsas sa mga pasilidad basi sa standard sa sports competition ilabi na sa swimming event.

"In which swimming is one of the best ways to do preventive actions para kita manatiling himsog, baskog. Salamat sa inyong presensya aron mapadayon sa probinsya sa Davao del Norte, nga kini among krusada and passion to promote health and wellness pinaagi kay Kuya Gov Edwin Jubahib para sa katawhan sa Davao del Norte, para sa katawhan sa Rehiyon Onse ug sa katawhan sa Mindanao," sumala ni Gulanes.

Ang Kadagayaan Sportsfest nidagan og duha ka adlaw nga nahuman niadtong Hunyo 25, agi’g kabahin sa selebrasyon sa Araw ng Davao del Norte karong Hulyo Uno tuig kasamtangan.

Samtang si Coach Clifford Villaren, usa sa mga organizer, nagkanayon nga gipangandaman sa PSYDO ang maong mga event ug gisiguro usab ang seguridad sa mga partisipante.

"I-assured gyud namo nga safety ang atong mga participants, kada different LGU nga moabot diri sa atong probinsya sa Davao del Norte," matud ni Coach Villaren.

Writer/Photos: Ma. Lorna P. Tripoli