Gipangunahan sa National Housing Authority (NHA) ug Provincial Social Welfare and Development Office (PSWDO) ang inspeksyon sa mga housing units nahimutang sa Barangay Cuambogan, Tagum City, niadtong Hunyo 27, 2023. Kini gihimo human girekomenda ni Kuya Gov Edwin I. Jubahib ug nauyonan sa Provincial Peace and Order Council (PPOC) ang pagsusi sa freedom residencies gumikan sa giingong pagkadelatar sa pag-ukopa sa 41 ka mga Friends Rescued (FRs).

Katuyoan sa mga evaluator team ang pagsuta sa ihap sa mga housing units nga naokupa na ug pagtan-aw sa mga istraktura nga wala pa natiwas tungod sa daghang kulang sa konstraksyon sama sa bintana ug pultahan.

Gibutyag ni NHA Regional Manager Clemente A. Dayot nga adunay 375 housing units nga namugna sa tuig 2012 nga nahuman sa tuig 2014. Niadtong 2016, gipuy-an sa mga AFP, PNP ug ubang mga empleyado niini ang pipila ka mga unit base sa kamandoan ni kanhi President Benigno Aquino III.

Samtang nasilip usab sa administrasyon ni kanhi President Rodrigo Roa Duterte nga sagad sa mga nag-okupang mga "men in uniform" nibiya na sa maong mga panimalay kay gidestino na sa lagyong mga dapit. Tungod sa maong rason, daghang unit ang nabakante hinungdan sa paghaon sa administrative order nga adunay board resolution sa NHA nga ang mga housing unit sa nasampit nga barangay itanyag na lamang sa mga FRs.

Nasayran nga ang pagpili sa mga awardee magabase sa rekomendasyon sa Joint AFP/PNP Intelligence Committee (JAPIC) nga maoy natahasan alang sa "Nanumbalik Loob Taskforce" subay sa pagpatuman sa Enhanced Comprehensive Local Integration Program (ECLIP).

"𝘗𝘢𝘳𝘢 𝘮𝘢𝘨𝘢𝘮𝘪𝘵 𝘴𝘢 𝘬𝘢𝘵𝘢𝘸𝘩𝘢𝘯, 𝘯𝘢𝘨𝘣𝘶𝘩𝘢𝘵 𝘰𝘨 𝘢𝘥𝘮𝘪𝘯𝘪𝘴𝘵𝘳𝘢𝘵𝘪𝘷𝘦 𝘰𝘳𝘥𝘦𝘳, 𝘵𝘩𝘦𝘯 𝘸𝘪𝘵𝘩 𝘵𝘩𝘦 𝘉𝘰𝘢𝘳𝘥 𝘙𝘦𝘴𝘰𝘭𝘶𝘵𝘪𝘰𝘯 𝘢𝘯𝘨 𝘕𝘏𝘈 𝘯𝘨𝘢 𝘱𝘢𝘳𝘢 𝘯𝘢 𝘭𝘢𝘯𝘨 𝘴𝘪𝘺𝘢 𝘴𝘢 𝘍𝘙. 𝘋𝘪𝘭𝘪 𝘭𝘢𝘯𝘨 𝘬𝘪𝘯𝘪, 𝘢𝘱𝘪𝘭 𝘱𝘢 𝘴𝘢 𝘣𝘶𝘬𝘪𝘥𝘯𝘰𝘯, 𝘢𝘱𝘪𝘭 𝘱𝘢 𝘴𝘢 𝘭𝘢𝘪𝘯𝘨 𝘭𝘶𝘨𝘢𝘳," sulti ni Dayot.