Isip pilot province nga nag-implimentar sa Balik Probinsya Bagong Pag-asa Program (BP2P) sugod 2020, padayong nagpaabot og financial assistance ug support packages ngadto sa mga BP2P beneficiaries ang Department of Social Welfare and Development (DSWD) sa pakigtambayayong sa probinsyal nga panggamhanan sa DavNor, maong gihagit sila ni Governor Edwin “Kuya Gov” Jubahib nga dili sayangan ang kwartang nadawat apan gamiton sa saktong pamaagi.
Atol sa BP2P payout nga gipahigayon sa DavNor Pavilion, nagpaabot ang gobernador sa iyang paghangyo nga mogamit og maayong inisyatibo ang mga benepisyaryo sa ilang paggasto sa kwarta aron makatabang kini og sustenir sa ilang mga inadlaw nga pagkinahanglan.
“Ang hangyo lang nako nga ang budget nga inyong madawat gikan sa national government ug provincial government, ang tanang suporta, dapat inyo pud ni siyang hatagan og saktong halaga. Ayaw tawon gastosa diretso ang kwarta nga mawala na dayon pagkaugma. Ang inyong himuon nga bisa’g sa inyong sariling pamaagi, para adunay sustainment, dapat kamo mismo mag-isip unsay inyong mga maayo nga plano para sa kwarta,” pagpasabot ni Kuya Gov.
Matud pa ni KALAHI CIDSS Regional Program Coordinator Lani Cudino, padayong nagahatag og pag-asa ang Balik Probinsya Bagong Pag-asa Program sa mga kaigsuonang mibalik pagpuyo sa DavNor pinaagi sa pagtanyag og transitory family support package, livelihood ug transitory shelter assistance apan mihangyo pud siya nga gastuhon og tarong ang cash assistance nga giapod-apod.
“Maka-receive mo karon og transitory family support package livelihood ug transitory shelter assistance…you are the happiest and the luckiest people kay dako kaayo inyong madawat sa shelter assistance. Pero maghangyo mi. In behalf of our Regional Director, maghangyo mi sa inyoha, kabalo man gyud mo kung asa idapat ang assistance nga ihatag kaninyo kay naa mi experience nga ang pang-shelter gi-down og motor naa puy uban after naka-receive kay nag-inom, tama ba ‘to? Ingon pa, ang gobyerno andam motabang sa nanginahanglan apan katong nanginahanglan dapat tabangan pud inyong mga kaugalingon,” sulti ni Cudino.
Ang maong payout ang first batch sa pag-release sa tuig 2023 diin nakadawat ang 71 ka mga benepisaryo sa DavNor og transitory family support package nga nagkantidad og P50,000, shelter assistance nga P90,000 ug aduna pud gitunol nga food packs ang Provincial Social Welfare and Development Office (PSWDO).
Writer/Photo: Danica Delight Villanueva
