Sa pinakaunang higayon gilusad ang Kiddie Fire Marshal sa Maniki Central Elementary School Sped Center niadtong Hunyo 30. Kini inisyatibong gipasiugdahan sa Municipal Fire Marshal sa lungsod sa Kapalong sa pakig-alayon sa Department of Education. Mokabat sa 60 ka mga pupils ang gipili nga mamahimong batang bombero ug kini nipailalom sa usa ka oras nga training kada adlawng Biyernes alang sa pagpasabot ug pagbansay sa mga kabataan kalabot sa paagi nga mapakgang ang posibleng sunog nga mahitabo.
Kasamtangang nakatungtong sa grade IV ug grade V ang nasampit nga mga batang bombero nga aktibo usab nagaapil sa Girls Scout ug Boys Scout of the Philippines. Libreng fire fighter uniform ang gihatag ngadto kanila agi’g pagdasig sa mga kabataan nga mas motuhop ang ilang mga gitun-an ug gilayong makab-ot ang ilang skills training development.
Nagpahayag si Senior Inspector Fire Marshall Melvin Esporsado sa kamahinungdanon sa pagtudlo sa mga kabataan bahin sa paglikay sa sunog uban sa pag-awhag sa LGU Kapalong nga suportahan ang ilang mga maayong tinguha.
"Sa tanang katawhan labi na diri sa Kapalong ug sa Davao del Norte nga atoa ning suportahan labi na sa ginikanan kay kami sa Bureau of Fire nagtinguha gyud nga ang tanang tao malikay sa sunog. So, sa mga bata matudloan na nato sila kung unsa angayang buhaton. Ang amoa lang hangyo, with the parents and local government units of Kapalong, ang Department of Education, ug eskwelahan nga magtambayayong niini nga programa kay kami sa Bureau of Fire andam kami sa paghatag og serbisyo niana,” ingon ni S/Insp Esporsado.
Samtang puno sa pasalamat ang School Principal nga si Grace Desonia uban sa pagsigurong safe ang mga magtutungha nga nagpailalom sa training. Sumala niya, sila nahigmata sa kaimportante sa kahibalo sa mga pamaagi sa pagpakgang sa kalayo human ang ilang tulunghaan nadamyos sa sunog niadtong bulan sa Marso.
"Among gipasalamatan ang Bureau of Fire nga ilang gihimo nga ang Maniki Central mamahimong una nga ilang mahatagan niining Little Kiddie Marshal nga ang atong mga kabataan ma-train," pagbutyag sa prinsipal.
Writer/Photos: Ma. Lorna P. Tripoli
