Giawhag ni Kuya Gov Edwin I. Jubahib ang katawhan labi na ang mga benepisyaryo sa Risk Reduction Program - Climate Change Adaptation and Mitigation (RRP-CCAM) nga magkuki’g pananom sa mga lagutmon ug gulay alang sa konsumo ug panginabuhian.

Ang pag-awhag gihimo sa gobernador atol sa payout sa CCAM benefeciaries niadtong Hulyo 3 sa Kapalong gym. Gipasabot sa gobernador nga dako’g tabang sa matag pamilya nga adunay gitanom alang sa ilang pagkaon.

Gipangunahan ni Kuya Gov ang pagtunol sa tag-P4,380 cash ngadto sa 83 ka mga indibidwal gikan sa mga barangay sa maong lungsod sama sa Gaboyan, Katipunan, ug Mabantao. Suhol kini sa 10 ka adlaw nga pagtrabaho sa komunidad.

"Kuyog ang atong municipal mayor, vice mayor hangtud sa barangay, barangay captains, councilors, board members, elective officials, congressman kung nganong ing-ana gyud ang atong gusto nga pagpaningkamot nga moabot sa inyoha. Kuyog ang mga national agencies nga makahatag ta’g ayuda sa matag-usa ka pamilya nga nagkinahanglan gyud. Makita nato nga kinahanglan mahatagan og ayuda tungod kay nabati nato unsa ang kalisud gyud sa inyong sitwasyon karon ug ako gyud nang nasabtan," sulti sa gobernador.

Sa maong okasyon gitunol usab ang ayudang pinansyal ngadto sa walo ka mga pamilya nga nabiktima sa sunog sa may Barangay Maniki, sakop sa nahisgutang lungsod. Ang insidente nahitabo niadtong bulan sa Marso niining tuiga. Nidawat og P5,000 cash ang mga tag-iya sa panimalay nga naka-angkon og partial nga damyos ug P10,000 cash ngadto sa mga biktima nga ang ilang panimalay nahimong abo.

Katambayayong sa gobernador ang DSWD, PSWDO, PAGRO, PCSO, AFP 60th IB, ug Mayor Maria Theresa Timbol sa pagtunol og tabang pinansyal sa mga benepisyaryo.

Writer/Photos: Ma. Lorna P. Tripoli