Nagdasok ang mga katawhan bitbit ilang mga iro ug iring alang sa libreng pagpakapon, pagpabakuna’g anti-rabies, pagpanghatag og vitamins ug pangonsulta sa ilang kahimtang panglawas nga gipahinabo sa DavNor Gym 2 (Training Center), DNSTC, Mankilam, Tagum City niadtong Hunyo 5, 2023. Ang aktibidad gipangunahan sa Provincial Veterinary's Office (PVO) duyog sa tabang sa Tagum City Veterinary's Office ug mga private stakeholders sama sa BMEG Corporation ug uban pa.

Sitenta (70) ka mga kahayopan ang nahatagan og medical attention. Kini nga kalihokan kabahin sa mga gihan-ay nga mga aktibidad sa Kadagayaan Festival sa probinsya ug sa ika-56 nga kasumaran sa Araw ng Davao del Norte.

Mas nibibo sa dihang nerampa ang mga pet owners sa runway dala ang ilang mga pambatong alagang mga iro alang sa kompetisyon. Gipakita ug gipaambit sab sa mga dog trainers ang teknik sa pagpasunod ug pagdisiplina sa mga iro. Cash ug usa ka sakong dog food ang gitangag nga prizes sa naasoy'ng dog show competition.

Sa susamang event, nagpahayag ni Dr. Generale sa PVO nga ang ilang buhatan libreng motunol og serbisyo medical sa mga kahayopan. Ang nahisgotang mga binuhi gikonsiderang kabahin na sa pamilya.

"Ako lang hangyo sa mga kaigsoonan nato nga adunay mga buhi nga ang atong mga opisina ready kanunay Monday to Friday nga nagserbisyo sa atong mga katawhan nga naa dinhi sa probinsya sa Davao del Norte. So, andam ‘mi mohatag og serbisyo kadtong adunay mga buhi nga mga hayop kay mao na ang mandato sa atong Honorable Governor Edwin Jubahib, ang paghatag og serbisyo kanunay sa mga igsoon nga adunay mga buhi nga kahayopan," sulti ni Dr. Generale.

Writer/Photos: Ma. Lorna P. Tripoli