Balor dos sientos mil pesos (P200,000) ang nabitbit nga premyo sa LGU Tagum City kinsa maoy napiling pinakanindut nga disenyo sa booth-making contest atol sa Kadagayaan Festival Trade Fair sa ika-56 Kasumaran sa Araw ng Davao del Norte.
Onse ka mga LGUs sa probinsya ang nag-apil. Misunod sa ikaduhang pwesto ang LGU San Isidro diin siento singkwenta mil pesos (P150,000) ang nadaug niining ganti ug ang LGU Braulio E. Dujali sa ikatulong pwesto nga nakauli og siento baynte mil pesos (P120,000) nga premyo. Gihimo ang awarding pinangunahan sa Provincial Agriculturist's Office sa DavNor Coliseum niadtong Hulyo 7, 2023.
Anaa sa maong awarding si Board Member Nicandro "Nickel" Suaybaguio Jr., ang nagrepresentar kang Kuya Gov Edwin I. Jubahib, kuyog si Board Member Francisco “Frank” Remitar, Talaingod Mayor Jonnie “Onit” Libayao, PSYDO Head Giovanni Gulanes, mga kawani sa PAGRO ug daghan pang uban.
"Ipaabot sa mga naminaw karon sa atong mga kaigsoonan sa Davao del Norte nga naningkamot ang atong Kuya Gov Edwin Jubahib uban sa tanang opisyales sa probinsya, sa SP nga gipangulohan sa Bise Gobernador De Carlo “Oyo” Uy ug sa tanang mga kauban, mga mayor sa onse ka mga LGUs, nga padayong naningkamot ang probinsya sa Davao del Norte despite sa nahiaguman natong pandemic. Hinay-hinay natong ibangon ang kasadya sa atong probinsya," sigon ni BM Suaybaguio.
Gitunol ang tarpaulin cash card big cheque ngadto sa mga palarang midaog sa booth-making contest alang sa ceremonial turnover sa premyo. Kalakip niini ang mga RBO tent dressing contest diin gi-display ang mga produkto sa mga LGUs sama sa Davao del Norte Coconut Farmers Federation nga gipasidunggan isip first prize winner balor singkwenta mil pesos (P50,000), Samahan ng Industriya sa Kaunlaran ng Pangangape sa Davao del Norte alang sa ikaduhang pwesto nga adunay kwarenta mil pesos (P40,000) nga premyo ug Rural Improvement Club ang nakaangkon sa traynta mil pesos (P30,000) sa 3rdprize.
Ang mga wala naapil sa top 3 sa RBO tent dressing contest, nakadawat og baynte mil pesos (P20,000) consulation prize sama sa Samal Farmer’s Association, Rice Farmer’s Association, Davao del Norte Cacao Industry, 4H Club, BFT/Kadiwa Federation ug uban pang pundok nga nilapag og mga produktong pang-agrikultura.
Writer: Maria Lorna P. Tripoli
