Gipangunayan ni Governor Edwin “Kuya Gov” Jubahib ang pagtunol sa sobra P9,700,000 nga kantidad ngadto sa mokabat 2,215 ka mga benepisyaryo sa Risk Resiliency Program thru Cash for Work Climate Change Adaptation and Mitigation (RRP-CCAM) nga midawat sa tag-P4,380 matag usa, sa Lungsod sa Sto. Tomas ug Island Garden City of Samal sugod niadtong Hulyo 4 hangtud 5 ning tuiga.

Unang gitunolan ni Kuya Gov ang lungsod sa Sto. Tomas, nga adunay mokabat sa 1,076 ka mga benepisyaryo nga gipahigayon sa Sto. Tomas Central Elementary School Gym sa Brgy. Tibal-og sa maong lungsod. Kauban sa gobernador ang mga personahe sa probinsyal nga panggamhanan ug ang mga opisyales sa Sto. Tomas nga gipangunahan ni Vice Mayor Ricky Inodioan.

Samtang niadtong Hulyo 5, gihatud ni Kuya Gov ang sweldo sa mga benepisyaryo sa IGACOS. Una niyang gihatdan ang 390 ka mga benepisyaryo sa Babak District ug gisunod dayon ang mokabat sa 758 ka mga benepisyaryo sa Kaputian District nga gipahigayon sa Anonang Gym, Barangay Anonang. Kauban gihapon ni Kuya Gov ang mga personahe sa kapitolyo ug ang mga opisyales sa IGACOS nga gipangunahan ni Vice Mayor Lemuel “Toto” Reyes.

Gipasalamatan og dako sa gobernador si Presidente Ferdinand “Bongbong” Marcos, Jr. gumikan sa way puas nga pagbubo og pondo sa probinsya sa Davao del Norte nga dakong ikatabang sa katawhan niini. Kalakip sab sa iyang gipasalamatan ang Department of Social Welfare and Development nga maoy tinubdan sa maong pondo.

Giawhag ni Kuya Gov ang mga benepisyaryo sa maong programa sa pagtanom og nagkadaiyang mga pananom sama sa gulay sa ilang palibot aron makatabang sa ilang pang-adlaw adlaw nga panginahanglan, ug mga kahoy alang sa pag-atiman sa kinaiyahan.

“Ato ning nakab-ot pinaagi sa atong pagpaningkamot nga matabangan ang mga katawhan nga nagkinahanglan og ayuda sa gobyerno. Dili man igo ang atong budget sa probinsya, sa city para ihatag og ayuda sa mga nanginahanglan pero naningkamot ta nga maka-access sa pondo gikan sa National Government para ihatag sa inyoha. Karon, mohangyo ko sa inyoha nga bisan sa inyo na lang initiative, sa inyoha na lang kaugalingong pamaagi, sa inyohang tugkaran sa inyong panimalay pwede mo magtanom,” ingon sa gobernador.

Ang RRP-CCAM, proyekto sa DSWD, nga nigahin og pondo aron paghatag panginabuhian sa mga walay trabaho diin ang mga benepisyaryo motrabaho’g napulo (10) ka adlaw sa komunidad alang sa pagpangandam may kalabotan sa epekto sa climate change, kalakip sab ang pagpamenus sa kagutom.

Writer/Photos: Nestor Mata, Jr.