Puno sa kasadya ug hudyaka ang mga Barangay Extension Workers (BEW) ug Barangay Technicians atol sa ilang pinasahi nga Fun Day activity nga gimugna sa Provincial Agriculturist's Office (PAGRO) alang kanila isip kabahin sa Kadagayaan Festival ug sa ika-56 nga Araw ng Davao del Norte sa DavNor Coliseum, Mankilam, siyudad sa Tagum niadtong Hulyo 6, 2023.

Ang mga BEWs ug Barangay Technicians naggikan sa 11 ka mga LGUs sa probinsya. Nagkadaiyang dula ang ilang gisaw-an nga puno sa kaalegre. Mismong si Kuya Gov Edwin I. Jubahib ang miduyog ug mihatag og mensahe sa pagpasalamat sa ilang kontribusyon nga malampusong mahatud ang serbisyong pang-agrikultura sa kabarangayan. Mitunol ang gobernador og P20 mil niadtong higayona alang sa dugang papremyo sa padula sa PAGRO.

Gikanayon sab niini nga ang maong okasyon himoong tinuig nga panagtigom sa CAGRO ug MAGRO ingo’g pasalamat niya nga nahimo silang katambayayong sa pagpatuman sa programang pang-agrikultura.

"Tungod kay dako kaayo akong pasalamat sa inyong participation sa atong paningkamot for the sustainable livelihood program and the agriculture program nato sa probinsya sa Davao del Norte leading to our economy," sumala ni Kuya Gov.

Samtang, si PAGRO Head Jose L. Andamon nagbutyag nga mikunhod na’g siete porsiento (7%) ang mga kabos sa kasamtangan sanglit ang serbisyong agrikultura nahatud gayud kanila. Giawhag niya ang mga BEWs nga sa bisan unsang concern may kalabotan sa mga mag-uuma, ipahibalo gilayon sa ilang opisina aron mahatagan dayon og pagtagad. Giagni sab niini nga mas pakusgon pa ang livestock vaccines.

"Ato nang pakusgon karon kay ang livestock dako nga panginabuhian sa mga kaigsoonang mag-uuma," matud ni Andamon.

Writer/Photo: Maria Lorna P. Tripoli