Nag-uban si Governor Edwin "Kuya Gov" Jubahib ug Vice Governor De Carlo "Oyo" Uy sa paghatud og ayuda alang sa mga residente sa lungsod sa Talaingod atol sa gipahigayong Payout of Financial Assistance alang sa mokabat usa ka libo (1,000) nga mga benepisyaryo sa Assistance to Individual in Crisis Situation (AICS), usa ka programa sa Department of Social Welfare and Development (DSWD) didto sa Brgy. Gym, Sto. Niño sa maong lungsod.

Kauban usab sila Board Member Nicandro “Nickel” Suaybagiuo Jr, Board Member Prospero “Popo” Estabillo Jr, Board Member Emmanuel “Mawe” Pamisaran ug mga kasundalohan nga gipangunahan ni MGen. Jose Eriel M. Niembra, ang komander sa 10thInfantry Division ug mga kapulisan nga gipangunahan usab ni PNP Provincial Director PCol. Antonio D. Alberio Jr.

Sa mensahe ni Kuya Gov, iyang gibatbat ang pagpaningkamot nga iyang gihimo aron mahatagan og hinanaling kasulbaran ang giatubang nga problema sa abaca. Giawhag niya ang mga katawhan nga dili na magtanom sa Daratex nga variety sa abaca kay wala nay mopalit niini. Hinuon, mopukos sa pagpananom sa Tanggongon nga variety.

“Ang hangyo nako sa inyoha, while nagtanom mo sa bag-ong abaca, undangon na nato tong daratex. Unya motanom mo og gulay ug mais. Ayaw paghulat adtong abaca kay duha pa man ka tuig. So, kung magtanom mo’g abaca, magtanom pud mo og gulay ug mais. Mag-distribute pud ko mga manok sa inyoha para naa moy mga manok nga padagkoon. Wala nay NPA, mao na akong hangyo sa inyoha para ang panginabuhi padayon ang pag-uswag sa matag pamilya. Kay kung wa nay giyera, wa nay gubot, wa nay NPA, moasenso ang mga taga-Talaingod, moasenso mo,” sumala ni Kuya Gov.

Gipaabot ni Vice Governor Uy ang iyang kinasingkasing nga pagpasalamat sa mga kadagkoang opisyal sa nasud nga maoy nahimong hinungdan sa pag-abot sa pondo nga gipang-apod-apod sa katawhan. Nanaad kini nga mopanda’yg balaud aron mahataga’g kasulbaran ang problema sa abaca nga giatubang sa mga katawhan sa Talaingod.

“Kining adlawa P2,000 ang madawat sa anaa diri karon. Another good news kay katong gihisgut ganiha ni Kuya Gov nagahin na pud ‘ta sa probinsya sa Davao del Norte. Naa na gyuy programa para specific ma-address kining abaca livelihood crisis dinhi mismo sa inyohang munisipyo sa Talaingod,” ingon sa bise gobernador.

Midawat og tag-P2,000 ang matag usa ka benepisyaryo aron magamit sa ilang mga batakang panginahanglanon.

Writer/Photos: Nestor Mata, Jr.

 

 

 

DavNor News

https://www.high-endrolex.com/26
https://www.high-endrolex.com/26