Mokabat sa 2,921 ka mga benepisyaryo sa Tulong Panghanapbuhay sa ating Disadvantaged/Displaced Workers (TUPAD) ang midawat sa kantidad P4,430 matag usa kanila nga gipahinabo sa DavNor Coliseum, DNSTC, Mankilam, Tagum City niadtong Hulyo 13, 2023.

Ang mga benepisyaryo naggikan sa 23 ka mga kabarangayan sakop sa siyudad sa Tagum. Ang ayudang pinansyal gipangunahan sa Department of Labor and Employment Regional Field Office ug sa Probinsyal nga Panggahamanan sa Davao del Norte pinaagi sa Provincial Administrative Office-Economic & Workforce Development Division (PAdO-EWDD).

Nagpaabot og mga mensaheng padasig sila Bise Mayor Allan Rellon sa Tagum dinuyogan sa representante ni 1stDistrict Congressman Pantaleon "Bebot" Alvarez alang sa mga benepisyaryo sanglit ang mga nahisgutan nagsilbing katambayayong sa gobyerno sa paghatud sa serbisyo sa komunidad.

Ang mga nadawat nilang salapi nagsilbing suhol sa napulo ka adlaw nilang pagtrabaho sa ilang mga dapit sama sa paghinlo sa mga kanal, pagpananom og kahoy ug uban pa.

Kahibaloan nga usa kini ka inisyatibang programa sa DOLE nga hugtanong gisuportahan ni Kuya Gov Edwin I. Jubahib pinaagi sa pagpanungkit og dugang pondo gikan sa nasyonal nga mga ahensiya aron mabubo ang mga programa alang sa katawhan.

"Ayuda ni, tabang sa tanang katawhan nga nanginahanglan. So, nagpasalamat ko nga kamo nahimong benepisyaryo aning atong pondo karon. Ako nga inyong Kuya Gov, kauban sa atong mga barangay captains nga maoy naghatag sa tanang listahan sa matag barangay, padayon ko nga maningkamot nga makakuha’g pondo para mahatag ang ayuda sa matag usa kaninyo," ingon ni Kuya Gov.

Writer: Maria Lorna P. Tripoli