Aron pakusgan ug hugtan ang pagbantay alang sa mga mosulod dinhi sa probinsya sa Davao del Norte agi sa kabukiran sa Talaingod, gibisita ni Governor Edwin “Kuya Gov” Jubahib kauban si Vice Governor De Carlo “Oyo” Uy ang utlanang bahin tali sa DavNor ug sa Bukidnon, nga nahimutang sa Sitio Natulinan, Brgy. Palma Gil, sa maong lungsod, niadtong Hulyo 11, 2023.

Kauban usab sila Board Member Nicandro “Nickel” Suaybaguio Jr, Board Member Prospero “Popo” Estabillo Jr, Board Member Emmanuel “Mawe” Pamisaran ug mga kasundalohan nga gipangunahan ni MGen. Jose Eriel M. Niembra, ang komander sa 10th Infantry Division, ug mga kapulisan nga gipangunahan usab ni PNP Provincial Director PCol. Antonio D. Alberio Jr.

Sa mensahe ni Kuya Gov, iyang gihangyo ang mga lumolupyo sa maong sitio nga motabang sa pagbantay ug pagmonitor sa mga mosulod gikan sa kasikbit nga lugar, sa ingon nga paagi, mapugngan ug mahadlok ang mga dautang elemento sa pagsabwag sa ilang dautang buhat sulod sa probinsya. Nanaad ang gobernador sa katawhan sa maong sitio nga iyang ihatud ang mga serbisyo ug mga programa sa gobyerno aron matabangan molambo ang ilang dapit.

“Ang akong usa nga tuyo nga ang atong checkpoint sa army ug sa atong PNP dugangan pa nato og isa. Mao ni ang checkpoint sa PDEA. Mahimo na ‘ni natong main border checkpoint kining inyong Sitio sa Natulinan kay apil na ang atoang checkpoint sa quarantine. Para maprotektahan gyud nato ang atong probinsya sa Davao del Norte laban sa posibleng mga kadaut nga mosulod sa atong probinsya. Busa, apil na gikan sa pananom, insurgency ug hangtud sa droga ang atoang paghatag pagprotekta sa atoang probinsya sa Davao del Norte,” sumala sa gobernador.

Nipadayag sa iyang dakong suporta si Vice Governor Uy sa lakang sa gobernador alang sa pagpatunhay sa kahapsay ug kalinaw sa probinsya. Mapasalamaton sab kini sa nahimong panaghiusa sa mga opisyal gikan sa probinsya, mga kapulisan ug kasundalohan sa tumong nga mamintenar ang nakab-ot nga insurgency free status sa probinsya.

“Mapasalamaton ko kay nakita ninyo nga nagkahiusa gyud ning tanan nga ania dinhi karon. Kay ang una gyud namong tumong, giingon na man to ganiha sa head nato sa pulis, PDEA, ug Philippine Army nga kinahanglan ang tanan magtinabangay para mapakgang na ’ni nato ‘ning insurgency diri mismo sa atoang probinysa, atoa nang nakab-ot. Mao na mapasalamaton ko ug rest assured nga kani inyohang batan-on nga bise gobernador, isip head sa Sangguniang Panlalawigan, nga kami ania karon, ug ang among presensiya para ipakita ang full support when it comes to peace and order programs, ilabi na kining checkpoint nato diri sa atoang probinsya sa Davao del Norte,” matud ni Vice Gov Oyo.

Nagpaabot sa iyang dakong pasalamat kang Kuya Gov si Mayor Jonnie Libayao gumikan sa makanuyayong suporta niini sa iyang mga ginsakopan pinaagi sa paghatag og mga nagkadaiyang proyekto nga nakatabang og dako sa mga katawhan sa maong lungsod.

“Bihira lang gyud ang opisyal nga moabot aning lugaraha. Mao ni atong pasalamatan si Kuya Gov, tungod kay ang iyang pag-anhi diri kinasing-kasing gayud nga paghatag og serbisyo, serbisyo nga tinud-anay,” pagsubay ni Libayao.

Nagpadayag sab sa ilang suporta ang mga kadagkoang opisyal sa Philippine Army (PA), Philippine National Police (PNP) ug Philippine Drug Enforcement Agency (PDEA). Nagkahiusa kini nga angayang pakusgan ug hugtan ang checkpoint sa utlanan aron dili na makasulod ang mga dautang elemento. Mapugngan sab ang pagkuyanap sa ilegal nga droga, ug ang pagsabwag sa kadaut sulod sa probinsya.

Writer/Photos: Nestor Mata, Jr.

 

 

 

DavNor News

https://www.high-endrolex.com/26
https://www.high-endrolex.com/26