Malampuson ang gipahigayong Swine Production and Management Seminar nga gipangunahan sa Provincial Veterinary Office sa pakigtambayayong sa San Miguel Foods Corporation (B-Meg) sa DavNor Coliseum, DNSTC, Mankilam, Tagum City.

Gitambongan kini sa gatosan ka mga swine technician ug mga namuhi’g baboy gikan sa nagkadaiyang LGU sa probinsya.

Sumala ni PVO-OIC Dr. Dennis Sumaoy, nga importante ang maong seminar aron mahibaloan ang tamang paagi sa pagpamuhi’g baboy ug malikayan ang pagtapot sa mga nagkadaiyang sakit nga moresulta sa pagkalugi. Gibatbat sab ni Sumaoy ang dakong tabang sa programa ni Kuya Gov nga DavNor KAAGAPAY sa liboan ka mga benepisyaryo nga nakapahimulos sugod pa niadtong Hulyo 2020.

“Ang pagpamuhi og hayop dako siya’g ikatabang sa mga katawhan labi na sa panahon nga adunay hinanali nga panginahanglan nila. Pwede nila magamit ibaligya para pag-eskwela o para pang-emergency cases,” sulti ni Dr. Sumaoy.

Gibutyag ni Dr. Sumaoy nga dili na ASF-free ang probinsya hinungdan nga padayon karon ang iyang buhatan sa pagmonitor sa mga kaso sa ASF ug paghatag impormasyon sa katawhan aron malikayan ang pagkuyanap niini.

“Actually, ang ASF sa Davao del Norte, dili pa gyud nato matawag nga we are free from ASF. Naa pay mga areas nga nagasige pa gihapon og gawas ang sakit o nagsige pa gihapon og kaigo ang atong mga kaigsoonan nga nagbuhi og baboy. Nakita man nato like in the case sa Panabo. Ang Panabo about to be declared na sana as ASF-free but niabot ang punto pag-evaluate nato, blood collection nigawas gihapon nga naa pay positive,” dugang ni Dr. Sumaoy.

Mapasalamaton ang mga partisipante sa maong seminar sa mga personahe sa San Miguel Foods Corporation (B-Meg) gumikan sa paghatag sa ilang mga bag-ong kahibalo kabahin sa tamang pagbuhi sa baboy. Nanghatag sab kini og mga pahalipay sa mga nitambong, mga medisina ug bitamina alang sa mga binuhing baboy.

Writer/Photos: Nestor Mata, Jr.