Gitunol ang mga Plaque of Recognition ngadto sa nagkadaiyang ahensiya, departamento, NGOs, mga Local Disaster Risk Reduction & Management Council ug uban pang pundok, alang sa ilang kamatinud-anon ug dalaygong suporta sa Provincial Disaster Risk Reduction and Management Council (PDRRMC) sa pagkab-ot sa kalamposan sa implementasyon sa mga programang mopahiangay sa kausaban sa panahon. Atol kini sa National Disaster Resilience Month culmination program sa VIP Clubhouse, DNSTC, Mankilam, Tagum City, niadtong Hulyo 31,2023, bitbit ang temang "BIDang Pilipino: Building a stronger Filipino Well-being towards Disaster Resilience".
Gipangunahan sa Provincial Administrative Office-Provincial Disaster Risk Reduction and Management Division (PAdO-PDRRMD) ang pagtunol sa pasidungog uban sa mga representante nila Governor Edwin "Kuya Gov" Jubahib, Congressman Pantaleon "Bebot" Alvarez ug mga department heads. Ubay-ubay ang mga midawat sa plake sama sa Davao Gulf Bantay Dagat Volunteers (DGBDV) Inc, mga Local Disaster Risk Reduction and Management Council, Provincial Environment & Natural Resources Office (PENRO), Provincial Information Communication & Knowledge Management Office (PICKMO), Provincial Social Welfare and Development Office (PSWDO), NGOs, kapulisan, ug uban pa.
Cash prize ug plake usab ang gidawat sa mga magtutongha nga nagmadaugon sa mga kompetisyon sama sa Music Video Jingle nga nasungkit sa Tagum City National High School ug LGU Kapalong. Samtang, ang poster making contest 1st prize nakuha sa Col. Rosalio Saludarez Elementary School alang sa elementarya ug Don Manuel A. Javellana Memorial National High School sa segundaryang kategorya. Kalakip ang ubang departamento sa kapitolyo nga midawat og cash prize sa pagdaog sa recycling ug upcycling contest.
Sa mensaheng gipaabot ni Kuya Gov Jubahib pinaagi sa iyang representante nagbutyag sa kamahinungdanon sa panaghiusa ug kooperasyon, nga luyo sa nasinating mga kalamidad, mas nagpalig-on kini sa subling pagbangon ug pag-atubang sa bisan unsang hagit sa panahon. Gipasalamatan sa gobernador ang mga ahensiya nga miyembro sa PDRRMC sa ilang matinud-anong suporta.
"I would like to express my deepest gratitude to all our partner agencies for their tireless dedication and wavering support in promoting disaster resilience across our province,” sulti ni Melmida.
Writer/Photo: Maria Lorna P. Tripoli
