Gihinumdom ug giila sa LGU Kapalong ang liderato sa mga kanhing mayor sa lungsod atol sa ika-75 niining kasaulogan sa Araw ng Kapalong niadtong Agosto 1, 2023. Apil na dinhi ang nipanaw nga mga mayor nga sila si Dominador Cruda Sr, Vicente Mariano Royo ug uban pa.

Gidawat sa ilang mga pamilya ang espesyal nga plake sa pagdumala ni Mayor Maria Theresa R. Timbol ug Bise Mayor Edgardo Tiimbol. Gipasidunggan usab ang ubang indibidwal nga naghatag og garbo sa lungsod human nga sila nakapasar sa Licensure Examination for Teachers (LET).

Gipasalamatan usab sa mayor ang mga opisyal sama nila ni Senator Lawrence "Bong" Go, Governor Edwin "Kuya Gov" Jubahib, Congressman Pantaleon "Bebot" Alvarez, hut-ong sa kasundalohan, PNP, NGOs ug mga miyembro sa konseho ug ubang mga nakigduyog aron makab-ot ang kalinaw ug kauswagan sa Kapalong. Samtang girekognisa usab sa inahan sa lungsod ang IP Community ug ang kinatibuk-ang katawhan nga dasig nisuporta sa administrasyong Timbol.

"Dili nato ‘ni mahimo kung wala ang suporta, wala ang pagtinabangay ug wala ang pagkahiusa sa katawhan sa Kapalong. For the remarkable achievement we have made over the past 75 years, ang katawhan ang dakong kabahin sa kalamposan nianing tanan. Like diamonds in the rough, we’re shinning after being polished through times. We rise up and now it’s our time to shine as one progressive municipality," sumala sa mayor.

Sa “Report 2023” ni Mayor Tes, iyang gibatbat ang P1,604,754 investment, P35,394,148 local resources revenue, tabang pinansyal sa 938 nga mga mag-uuma sa kantidad nga lima ka libo ka pesos (P5 mil), 20,000 ka dekalidad nga punoan sa lakatan ug 30,000 ka punoang cavendish alang sa sektor sa sagingan ug mga proyekto, programa ug uban pang mga planong pangkalamboan.

Writer/Photos: Maria Lorna Tripoli