Nagkatigom ang gatosan ka mga Persons with Disability (PWD) sa gipahinabong Provincial PWD General Assembly sa Robinsons Place, National Highway sa siyudad sa Tagum, niadtong Agosto 4, 2023. Gitigayon kini pinaagi sa Provincial Disability Affairs Office (PDAO) ubos sa pagdumala sa Provincial Social Welfare and Development Office (PSWDO) ug Provincial Human Resource Management Office (PHRMO).

Ang pagnominar ug pagbotar nga gisalmotan sa mga PWD's alang sa mamahimong Disability Affairs Officer IV sa Kapitolyo ubos sa Provincial Governor's Office (PGO) maoy gitagaan og gibug-aton sa naasoyng asembleya. Tulo ka mga indibidwal ang pagapilian base sa ilang kwalipikasyon ug kini sila moagi pa sa Personnel Selection Board sa PHRMO. Usa lamang kanila ang pagapilion ug ipresentar kang Governor Edwin "Kuya Gov" Jubahib. Ang mopasar sa maong proseso magsilbing magdumala ug tigpamaba kon focal person alang sa mga serbisyong PWDs. Katambayayong usab kini sa gobernador sa pag-ila ug pagtunol sa mga programa alang sa maong sektor.

"Kini nga sektor kabahin sa plano, kabahin sa pag-execute, kabahin sa pagmonitor o pag-evaluate, ug meaning kabahin kini nga sektor sa tanang proseso alang sa kalamboan dili lamang sa sektor sa Persons with Disability but sa tanang sektor kay plantilla position man siya," matud ni Palero.

Samtang gikanayon ni DSWD-PDAO Focal Person Jucelyn Lumangtad, nga kini ang talagsaong higayon nga ang probinsyal nga panggamhanan hinay-hinay na nga nagpatuman sa paglakip sa mga PWDs sa panggobyerno.

"This is a great moment for us sa atong panawagan for a disability inclusive governance. So, sa Davao del Norte, ato na gyud nang gipahigayon nga bisan sa hinay-hinay but the provincial government will initially embrace the principle and the framework of a disability inclusive governance and itself by virtue of the Provincial Ordinance makaingon gyud kita nga is more significant character and that we are initiating," sigon ni Lumangtad.

Writer/Photos: Maria Lorna Tripoli