Mapasigarbuhong gidawat ni Governor Edwin "Kuya Gov" Jubahib ang pasidungog isip Outstanding Provincial Governor for Mindanao Island gikan sa Association of Local Social Welfare and Development Officers of the Philippines, Inc. (ALSWDOPI).
Gitunol ni ALSWDOPI National President Marybeth Mateo-Ortiz ang maong award kang Kuya Gov, atol sa gipahigayon nga Gawad Parangal sa 26th National Social Welfare and Development Forum and General Assembly ganinang buntag sa SMX Convention Center, Davao City.
Apil si Kuya Gov sa upat lang ka mga gobernador nga midawat sa award, sanglit duha ang gikan sa Luzon ug tagsa gikan sa Visayas ug Mindanao, kauban sab ang ubang giila nga awardees nga mga mayores ug social workers gikan sa nagkadaiyang rehiyon sa Pilipinas.
Gihatagan og gibug-aton sa ALSWDOPI ang talagsaong dedikasyon ug daghang kadaogan ni Kuya Gov sa pagsulong sa programa sa social protection, agrikultura, imprastraktura ug uban pa nga nakahaw-as sa katawhan gikan sa kapobrehon ug nakapalambo sa lokal nga ekonomiya.
"His comprehensive programs on social protection and social welfare, agriculture, education, health care, infrastructure and tourism have uplifted the living standard of the Dabaonons, created employment opportunities and boosted the local economy," sulti sa maong award.
Gihanyag sa gobernador ang mabulukon nga pasidungog ngadto sa katawhang Dabaonon nga maoy iyang inspirasyon sa paghatag sa tinud-anay nga serbisyo.
Kahinumdoman nga bag-ohay pa lang, midawat siya niadtong bulan sa Hunyo sa iyang ikaduhang Governor of the Year Award gikan sa Nation Builders and Mosliv Awards sa Sustainability Standards Inc.
Sa iyang pagpamulong isip guest speaker sa maong okasyon, giila sab ni Vice President Sara Duterte ang kakugi ug sakripisyo sa mga local chief executives ug local social welfare and development officers, isip "foot soldiers of social change".
Iyang gipaniguro ang sinseridad sa administrasyon ni Pangulong Ferdinand "Bongbong" Marcos, Jr. aron matabangan ang mga nanginahanglan ug mahaw-as ang mga Pilipino gikan sa kalisud.
Writer/Photos: Noel Baguio
