Gihinumdoman ni Tagum City Mayor Rey T. Uy ang ilahang mga kaagi ni BM Didi sa dihang nagkuyog sila panahon sa ilang termino isip board member sa Probinsya niadtong dekada 90. Gustong handumon ni Mayor Uy ang mga malipayong kaagi nila ni BM Didi ug gipasalamatan niya kini sa dakong kontribusyon nga iyang nahimo sa Probinsya.

Gibalikan ni Board Member Shirley Belen Aala ang dakong kontribusyon nga gihimo ni BM Didi sa mga kababaihan sa dihang siya ang nahimong chairwoman sa Provincial Women’s Council.

Nagpaabot sa iyang pahasubo si kanhi Vice Governor Pedro San Jose, sumala niya nga mahinumdoman ang pangalan ni BM Didi sa mga katawhan sa DavNor isip simbolo sa dedikasyon ug pagpalabi sa uban.

Gisaysay ni Vice Governor Oyo Uy ang iyang mga kasinatian samtang gamay pa siya sa dihang iyang unang nakit-an si BM Didi ug wa siya nagdahom nga maabot niya ang posisyon nga iyang gigunitan karon.

Gidayeg ni Governor Edwin “Kuya Gov” Jubahib ang daghang nahimo ni BM Didi. Sumala niya nga dili lamang kini miyembro sa Sangguniang Panlalawigan apan usa kini ka haligi sa integridad. Dugang ni Kuya Gov nga andam si BM Didi mobarog alang sa kaayohan sa tanan ilabi na sa sektor sa kababayen-an. Giawhag ni Kuya Gov ang mga katawhan nga hinumdoman sa kanunay ang legasiya nga gibilin ni BM Didi.

Nagpaabot si Naxides Nuñez Ebarle, ang kinamagulangang anak ni BM Didi sa iyang dakong pagpasalamat sa mga opisyales sa probinsya sa paghatag importansiya og pagyukbo sa ilang pinalanggang inahan.

Nahimong miyembro sa Sangguniang Panlalawigan si BM Didi niadtong dekada 90 sa wala pa nabahin ang probinsya sa Davao del Norte samtang naghupot kini sa managlahing posisyon sa gobyerno human sa iyang termino isip Chairwoman sa Provincial Women’s Council ug uban pa. Samtang nakadawat sab kini’g daghang mga award nga nagpamatuod ug nagpakita sa iyang maayong performance isip opisyal sa gobyerno.

Writer/Photos: Nestor Mata, Jr.