Tinguha sa panggamhanang probinsyal ubos sa liderato ni Governor Edwin "Kuya Gov" Jubahib nga  masiguro nga ang tanang kababaihan labi na ang mga nagburos nga luwas ug himsog sa ilang pagpanganak pinaagi sa maternal and health care program. Sa Provincial Buntis Congress nga gipahinabo sa Davnor Gym, Agosto 23, 2023 nga adunay temang "Pagsulong Tungo sa Malusog at Ligtas na Pagdadalang-Tao" gitigayon ang HIV testing, blood pressure checkup ug uban pang serbisyong medikal sa pagpanguna sa Provincial Health Office (PHO).

Kini ang unang higayon sa panagtigom sa mga buntis human milabay ang pandemyang covid-19 nga gitambongan sa mga sistrict, city ug municipal health officers, mga specialists, representante sa Department of Health (DOH) ug uban pa.

Mihatag og mensaheng padasig si DOH Regional Office XI Dir. Annabelle Yumang ngadto sa mga partisipante nga ampingan ang ilang panglawas ug makanunayong himuon ang pagprenatal alang sa luwas nga pagpanganak.

"We hope na our pregnant mothers karon, mopadayon mo ug ayaw mo og laktaw sa inyong mga pag-prenatal ha, gani pag-abot sa nine months nato, kada semana o weekly na ang pag-adto nato sa mga health centers," sumala ni Dir. Yumang.

Daghan usab ang topiko nga gibatbat ni Dr. Chiara Mae Lascuña ang OB-Gyne Sonologist kabahin sa "journey" sa pagmabdos.

Samtang sa maong okasyon gipakita sa mga partisipante nga dili babag ang pagmapdos sa ilang pagrampa sa emtablado suot ang maternity dress. Nidaug isip Miss Provincial Buntis Congress ang buntis nga taga-Sto.Tomas nga niangkon usab sa pasidungog nga Miss Perfect Smile, 1st runner up ang taga-Asuncion, 2nd runner up ang taga-Panabo City ug 3rd runner up ang buntis nga nagrepresenta sa Tagum City. Uban kanila nga wala nidaug nidawat og sertipiko sa pagpartisipar. Kutob sa mitambong nga mga buntis nakadawat kini’g mga pahalipay nga maternal kits.

Writer/Photos: Maria Lorna P. Tripoli