Andam na ang Commission on Election Davao del Norte Field Office sa umalabot nga Barangay ug Sangguniang Kabataan Election, kini ang pahayag ni Provincial Election Supervisor Atty. Norliza M. Mamukid, REB, REA, SH.C atol sa gipahigayong 1stDavao del Norte Provincial Joint Security Coordinating Conference sa VIP Clubhouse, Davao del Norte Sports and Tourism Complex (DNSTC), Mankilam, Tagum City, niadtong Agosto 24, 2023.

“Ang Comelec, andam kaayo karong October 30, 2023, Barangay, Sangguniang Kabataan Election. So, karong adlawa nag-activate ang atong Joint Security Control Center sa Davao del Norte. Atoang gi-invite ang atoang mga counterpart from the PNP and AFP. Simultaneous ni siya sa entire province of Davao del Norte,” matud ni Atty. Mamukid.

Gibatbat ni Atty. Mamukid ang mga kinahanglang bantayan panahon sa election sama sa filing of candidacy, pagdeklara sa gun ban, pagdili sa sayong pangampanya, liquor ban ug uban pa. Dugang ni Atty. Mamukid nga ang election period magsugod sa Agosto 28 ug mahuman sa Nobyembre 14, 2023.

Giawhag ni Panabo City Election Officer Atty. Norberto J. Sinsona, Jr., ang mga nanag-iya’g mga armas sa paglikay sa pagdala niini gawas sa ilang mga panimalay panahon sa election period. Apan kung dili gayud malikayan o di ba kaha gamit sa ilang pagpanarbaho, kinahanglan kining mo-apply og exemption ngadto sa buhatan sa Comelec.

Gipaniguro sa mga kadagkoang opisyal sa Philippine National Police ug Philippine Army nga andam na usab sila alang sa umalabot nga lokal nga piniliay.

Sa habig sa probinsyal nga panggamhanan, gibutyag ni Provincial Treasurer Evelyn G. Espra, MPA, nga andam na usab ang iyang buhatan sa pagdawat sa tanang mga election paraphernalia nga gamiton karong umalabot nga election.

Writer/Photos: Nestor Mata, Jr.