Gimandoan ni Governor Edwin “Kuya Gov” Jubahib ang Provincial Engineering Office nga ayohon sa labing daling panahon ang naputol nga dalan sa Sitio Kamonuan, Barangay Gupitan, Kapalong, atol sa gipahigayong meeting sa Provincial Development Council sa Capitol Pavilion, DNSTC, Mankilam, Tagum City, Septyembre 7, 2023.

“Ugma siguro i-emergency nato’g dala didto ang mga equipment para matambakan ‘tong area nga naputol para maagian na. So, may I request to the Provincial Engineer, Engr. Glen Olandria to make a full force of our resources para to repair those roads in going to Gupitan,” sumala ni Kuya Gov.

Adtoan ugma dayon, kini usab ang tubag ni Engr. Glen Olandria ang labaw sa Provincial Engineering Office. Sumala niya nga magpadala siya’g mga heavy equipment sa maong lugar nga apektado sa maong problema aron mahatagan gilayon og solusyon.

Gihimo ang maong kamandoan isip hinanaling aksyon sa gobernador sa hangyo ni Mayor Maria Theresa Timbol sa lungsod sa Kapalong, nga nagtaho may kabahin sa nahitabong pagkaputol sa dalan sa Sitio Kamonuan. Sumala ni Mayor Timbol nga naluoy siya sa mga katawhan sa maong barangay sa kabudlay nga nasitian niini sa pagpagawas sa ilang mga produkto sa uma.

Subay sa maong PDC Meeting, giaprobahan sa mayorya ang 2nd revision sa Provincial Development Investment Plan alang sa Calendar Year 2023-2025 ug ang 2nd revision sa Annual Investment Plan alang sa Calendar Year 2023. Giaprobahan sab ang Proposed Amendment sa Annual Investment Plan alang sa Calendar Year 2024.

Nitambong sa maong council meeting ang mga pangulo sa mga departamento sa kapitolyo nga gipangunahan ni Provincial Administrator Engr. Josie Jean Rabanoz, Board Member Orly Amit, Board Member Devona Jumamil, mga mayor ug representante sa mga local government units, mga ahensiya sa national nga panggamhanan ug uban pang sektor sa katilingban.

Writer: Nestor Mata, Jr.