Mokabat sa 37 ka mga personahe sa Probinsyal nga Panggamhanan sa Davao del Norte ang gibansay aron mamahimong event host sa nagkadaiyang aktibidad sa probinsya, sa Bulwagan ng Karunungan, Capitol Compound, Mankilam, Tagum City, Septyembre 6, 2023.
Sumala ni Provincial Human Resource and Management Officer Edwin Palero, nga gihimo ang maong kalihokan agi’g pagpangandam sa mga umalabot nga mga programa nga pagadumalahon sa probinsyal nga panggamhanan.
“We are actually looking for employees who can take the responsibility, brave enough, courageous enough to host an event, facilitate an event ug siguro kung magustohan gyud mo ni Kuya Gov tingali’g dad-on mo ni Kuya Gov bisan asa siya. Murag kamo nay himuon og tig-present sa iyang kaugalingon. After this, we will make an administrative order nga atong i-revised ang composition sa HRD Core Group. Naay section pool of event host, so kung naa tay pool of trainers, naa pud tay pool of ushers, naa na pud tay pool of host,” ingon ni Palero.
Sa mensahe ni Governor Edwin “Kuya Gov” Jubahib nga gibasa sa iyang Executive Assistant Reynante Monares, iyang gipasalamatan ang mga partisipante gumikan sa gipakitang interes sa maong kalihokan. Nanghinaot kini nga magamit nila ang ilang nakat-onan sa training sa mga umalabot nga aktibidad sa probinsya.
“Today’s training for event hosting techniques is intended just like that and to help our participants harness their training potential in field of event hosting,” sulti ni Monares.
Gipasabot ni Provincial Information, Communication and Knowledge Management Officer Dr. Mervin Jay Suaybagiuo nga ihatag ang tanang kahibalo alang sa mga partisipante sa dili pa sila mo-host sa mga dagkong event sa probinsyal nga panggamhanan. Giawhag sab niya ang mga partisipante sa pag-volunteer kung ugaling man adunay mga event sa ilang tagsa-tagsa ka mga departamento.
“We’ve seen a lot of employees sa Provincial Government nga naa gyud potentials to be our next host. So, dili pud mo namo isabak diretso nga mangapa pa pud mo. Iplastar gyud mo namo until such time nga mahinog namo, and then later on kamo na ang mag-host sa atong mga big events dinhi sa Provincial Government,” matud ni Suaybaguio.
Nahimong resource speaker sa maong event ang celebrity host nga si Atty. Resci Angelli Rizada-Nolasco. Nipaambit kini sa iyang mga personal experience sa hosting kalakip sab ang mga mabulokong technique nga sarang magamit sa mga partisipante panahon nga sila na ang magdumala sa usa ka programa.
Writer: Nestor Mata, Jr.
