Pormal nang gi-turnover sa Probinsyal nga Panggamhanan sa Davao del Norte ubos sa pagdulama ni Governor Edwin “Kuya Gov” Jubahib ang mokabat P3.5 milyon nga multiplier farm sa Barangay Sabangan, San Isidro, Septyembre 7, 2023.
Sa giluwatang pahayag ni OIC-Provincial Veterinary Officer Dr. Dennis Sumaoy nga dako’g ikatabang sa mga lumolupyo sa maong lungsod ang katukoran sa multiplier farm nga magsilbing tinubdan sa mga nagkadaiyang hayop sama sa kanding ug manok. Dugang niya nga adunay inisyal nga 13 ka pure bred nga kanding ug 50 ka pure bred nga manok.
“Officially, turnover na ang atoang multiplier farm nga nagkantidad og P3.5 milyon. Dako kaayo ni siya’g ikatabang, not only here in the municipality of San Isidro but all throughout the Province of Davao del Norte. Rest assured nga ang Provincial Veterinarian’s Office, willing motabang or andam mosuporta sa mga programa sa livestock especially kaning sa multiplier farm,” matud ni Dr. Sumaoy.
Sa mensahe ni Kuya Gov pinaagi sa iyang Head Liason Officer Emilio Baguio, iyang gipaabot ang iyang dakong pasalamat sa mga katawhan sa San Isidro gumikan sa makanunayong suporta nga ilang gihatag kaniya. Siya maningkamot sa paghatag sa mga nagkadaiyang proyekto nga makatabang sa padayong kalamboan nga nasinatian karon sa maong lungsod.
Nagpadangat sa iyang dakong pasalamat kang Kuya Gov si Mayor Silvano “Banot” Gaje, nga nagkanayong mahal gayud ni Kuya Gov ang mga taga-San Isidro gumikan sa daghang mga proyekto nga gibubo sa gobernador sa iyang lungsod. Gumikan niini, nanaad siya sa iyang hugtanong suporta sa tanang mga programa sa gobernador nga makahatag kaayohan sa mga katawhan sa probinsya.
“Kining gihatag ni Gov, ato gyud ning ampingan, kay kini, nahibaw mo og unsa ta ka palangga ni Gov dinhi sa atoang lugar. Tungod sa kapalangga nato, kita gyud ang unang gitagaan diri. Naa gyud sa atoang Barangay Sabangan,” butyag sa mayor.
Ang maong multiplier farm, gilangkoban sa usa ka gambalay alang sa kanding ug duha sab alang sa mga manok, samtang nagsugod na kini’g pasanay sa maong mga hayop aron ipang-apod-apod sa mga lumolupyo sa San Isidro.
Writer: Nestor Mata, Jr.
