Mabungahon ang gihimong presentasyon sa Technical Working Group (TWG) sa Provincial Development and Physical Framework Plan (PPDPFP) 2023-2028 ngadto sa mga national government agencies (NGAs) niadtong Septyembre 8, 2023.

Madasigong mihayag sa ilang mga komento ug inputs ang mga partisipante, aron mapino pag-ayo ang pagtapos sa draft sa maong plano, kalabot sa tinguha ni Kuya Gov nga maluntaron ug inklusibo nga kalamboan sa Davao del Norte.

Sulti ni Acting Provincial Planning and Development Coordinator Engr. Hazel Zafra nga ang gihimo nga PDPFP nagadetalye kung unsaon paggamit sa recursos naturales aron sa pagpalambo sa probinsya ug sa pag-uswag sa katawhang Dabaonon.

Kini magsilbing mapa alang sa medium-term nga kalamboan sa probinsya, samtang modugtong sab kini sa mga programa sa probinsyal nga panggamhanan ngadto sa mga prayoridad sa nasyonal nga panggamhanan.

Basehan sab kini alang sa annual investment programming ug budgeting sa probinsya, nga kinahanglanon kaayo sa kalihokan ug paglambo sa ekonomiya sa Davao del Norte.

Pagkahuman sa maong plano ipasa kini sa TWG ngadto sa Provincial Development Council (PDC), nga maoy mosumite aron aprobahan sa Sangguniang Panlalawigan (SP).

Writer: Noel Baguio