Gikatakda nga moapil na si Board Member Ariel Macla sa regular session sa Sangguniang Panlalawigan (SP) karong Lunes, Septyembre 25, 2023, sa iyang balik-paglingkod isip Indigenous Peoples Mandatory Representative (IPMR) sa hawanan sa Hunta Probinsyal sa Davao del Norte.

Kini human nga gihatagan na siya og Certificate of Affirmation (COA) sa National Commission of Indigenous People (NCIP) XI, tungod sa Writ of Mandamus nga gipagula sa korte pabor kang Macla.

Kahinumdoman nga midaog isip IPMR si Macla sa ikaduhang higayon sa gipahigayon nga selection process sa mga tribal chieftain ug mga IPMR sa nagkadaiyang lungsod ug dakbayan sa probinsya niadtong Enero 9, 2023.

Apan, dul-an siyam ka bulan nga wala siya kalingkod sa SP tungod sa pagbabag sa mayorya sa iyang kaubanan nga board member gumikan kay wala siya matagaan og COA ni NCIP-XI Regional Director Mumar M. Mamukid sa wala mahibaw-i nga rason.

Mao nga mipasaka si Macla og Petition for Writ of Mandamus sa Regional Trial Court aron mandoan ang NCIP nga mohatag sa maong COA.

Nalipay pag-ayo si Governor Edwin "Kuya Gov" Jubahib sa pagbalik ni Macla kay matagaan na gyud og saktong representasyon sa SP ang mga kabus nga tribu, labi na sa pagpalig-on sa mga programa ug serbisyo aron sa pagpalambo sa kahimtang sa mga IPs.

"(Ang) kabubut-on sa mga tribu mao gyud ang dapat mopatigbabaw. Ang imong kadaogan dili lang kadaogan sa mga IPs, apan kalamposan sa tibuok Davao del Norte. Walay makababag sa atong tinguha alang sa paglambo sa atong mga kaigsoonang IPs," maoy sulti ni Kuya Gov sa iyang post sa Facebook.

Mipahayag sab sa ilang suporta kang Macla sila Board Member Nicandro Suaybaguio, Jr., Prospero Estabillo, ug Francisco Remitar, DILG Provincial Director Jonathan Leybag, ug NCIP Provincial Director Roger Lumbin.

Writer/Photo: Noel Baguio

 

 

 

DavNor News

https://www.high-endrolex.com/26
https://www.high-endrolex.com/26